এতিয়া বাহনৰ নথি পত্ৰ অৰ্থাৎ ৰেজিষ্ট্ৰেশ্যন চাৰ্টিফিকেট(আৰ চি), ড্ৰাইভিং লাইচেন্স (ডি এল), প্ৰদূষণৰ প্ৰমান পত্ৰকে ধৰি সকলো নথি মোবাইল নম্বৰৰ সৈতে সংযোগ কৰাটো জৰুৰী হ’ব।
এই নিয়ম অহা ২০২০’ৰ ১ এপ্ৰিলৰ পৰা কাৰ্যকৰী হ’ব। এই সন্দৰ্ভত কেন্দ্ৰীয় পথ পৰিবহন আৰু ঘাইপথ মন্ত্ৰালয়ে এক অধিসূচনা জাৰি কৰি এই বিষয়ত ৰাইজৰ পৰা পৰামৰ্শ বিচাৰিছে।
এইক্ষেত্ৰত লোকসকলে ৩০ দিনৰ ভিতৰত অৰ্থাৎ ২৯ ডিচেম্বৰ পৰ্যন্ত নিজৰ পৰামৰ্শ কেন্দ্ৰীয় পথ পৰিবহন আৰু ঘাইপথ মন্ত্ৰালয়ক প্ৰেৰণ কৰিব পাৰিব।
বুধবাৰে কেন্দ্ৰীয় কেবিনেটে পাৰ্ছনেল ডাটা প্ৰটেকশ্যন বিধেয়কত অনুমোদন জনোৱাৰ সময়তে এই কথা পোহৰলৈ আহিছে।
এই বিধেয়কখনৰ জৰিয়তে ৰাজহুৱা আৰু ব্যক্তিগত কোম্পানীৰ বাবে পাৰ্ছনেল ডাটা বা ব্যক্তিগত তথ্য নিয়ন্ত্ৰণ কৰাৰ ব্যৱস্থা গ্ৰহণ কৰা হ’ব।
আশা কৰা হৈছে যে বাহনৰ নথিপত্ৰৰ সৈতে মালিকৰ মোবাইল নম্বৰ লিংক কৰা হ’লে গাড়ীৰ চুৰি হোৱাৰ তথ্য লাভ কৰাত সহায় হ’ব। বাহনৰ নথিপত্ৰৰ সৈতে মোবাইল নম্বৰ লিংক কৰা থাকিলে গাড়ী চুৰিস ক্ৰয়-বিক্ৰয়ত নিয়ন্ত্ৰণ কৰাত সহায়ক হ’ব।
তদুপৰি, বাহনৰ তথ্য ভাণ্ডাৰত মোবাইল নম্বৰ লিংক কৰা থাকিলে জিপিএছ’ৰ উপৰি মোবাইল নম্বৰৰ সহায়ত যিকোনো ব্যক্তিৰ স্থিতিৰ সন্ধান লাভ কৰিব পৰা যাব।
ইয়াত বিশেষকৈ পথ দুৰ্ঘটনা, অপৰাধ সংঘটিত কৰাৰ পাছত আৰক্ষীয়ে উক্ত ব্যক্তিৰ তৎকালীনভাৱে সন্ধান লাভ কৰিব আৰু ভ্ৰষ্টাচাৰৰ পৰাও সকাহ পোৱা যাব।
ইয়াৰ লগতে কেন্দ্ৰীয় চৰকাৰ আৰু আন চৰকাৰী সংস্থাৰ হাতত সকলো বাহন আৰু ড্ৰাইভিং লাইচেন্সৰ সম্পূৰ্ণ তথ্য, মোবাইল নম্বৰৰ সৈতে মজুত থাকিব।
প্ৰয়োজন হ’লে আৰক্ষী, আৰ টি অ’ বা আন কোনো সংস্থাই সহজতেই বাহন চালক বা ইয়াৰ মালিকৰ সৈতে সম্পৰ্ক কৰিব পাৰিব। আনহাতে, ডাঙৰ মহানগৰসমূহত ইন্টেলিজেন্ট ট্ৰেফিক মেনেজমেন্ট কাৰ্যকৰী কৰিব পৰা যাব।
