নিষ্ঠুৰতাৰ চূড়ান্ত নিদৰ্শন : সামান্য খেজুৰৰ ৰস খোৱা বাবেই নিৰ্মম প্ৰহাৰেৰে ঘুণীয়া কৰিলে আঠবছৰীয়া শিশুক
অপৰাধৰ ভাষা নুবুজা এটি শিশুৰ ওপৰত বৰ্বৰ আক্ৰমণৰ ঘটনাই জোকাৰি গৈছে বৰপেটা জিলাৰ হাউলী অঞ্চল। সামান্য খেজুৰৰ ৰস খোৱাৰ অপৰাধতে মুক্তাৰ আলী নামৰ এজন ব্যক্তিয়ে এটি ৮ বছৰীয়া শিশুক নিৰ্মমভাৱে প্ৰহাৰ কৰাৰ লগতে প্ৰাণে মৰাৰ চেষ্টা চলায়।
বাক্সা জিলাৰ গোৱৰ্ধনা আৰক্ষী থানাৰ অন্তৰ্গত কাউৰপাৰা গাঁৱৰ অতি দৰিদ্ৰ আকবৰ আলীৰ ৮ বছৰীয়া শিশু পুত্ৰ মহিদুল আলীয়ে উত্তৰ কালজাৰ গাঁৱৰ মুক্তাৰ আলী ওৰফে মুত্ত আলীৰ পথাৰত থকা খেজুৰ গছৰ পৰা নোকোৱাকৈ অলপ ৰস খাইছিল। আৰু সেই অপৰাধতে শিশুটিক অতি নিৰ্দয়ভাৱে উপৰ্যুপৰি প্ৰহাৰ কৰে।
মুক্তাৰ আলীৰ প্ৰহাৰত গুৰুতৰভাৱে আহত হয় শিশুটি। উল্লেখ্য যে শিশুটোক মাৰধৰ কৰি পেলাই থৈ যোৱা ঘটনাৰ সবিশেষ লগত থকা আন শিশুকেইজনে ঘৰত আহি জনোৱাত পৰিয়ালৰ লোকসকল ঘটনাস্থললৈ গৈ শিশুটিক উদ্ধাৰ কৰে।
অতি গুৰুতৰভাৱে আঘাতপ্ৰাপ্ত হৈ পৰি থকা শিশুটিক পৰিয়ালৰ লোকে লগে লগে বৰপেটা চিকিৎসা মহাবিদ্যালয়ত ভৰ্তি কৰায় যদিও উন্নত চিকিৎসাৰ বাবে চিকিৎসকে গুৱাহাটী চিকিৎসা মহাবিদ্যালয়লৈ প্ৰেৰণ কৰে।
সম্প্ৰতি গুৱাহাটীৰ নাৰায়না চুপাৰ স্পেচিয়েলিটি হাস্পতালত চিকিৎসাধীন হৈ আছে শিশুটি। এই সংক্ৰান্তত শিশুটিৰ পৰিয়ালে বৰপেটাৰোডৰ শিমলাগুৰি আৰক্ষী চকীত এখন এজাহাৰ দাখিল কৰিছে।