১৪ বছৰৰ পাছত আদালতে দিল্লীৰ সাংবাদিক সৌম্য বিশ্বনাথনক হত্যা কৰাৰ অপৰাধত ৫জন লোকক দোষী সাব্যস্ত কৰিছে।
দিল্লীৰ চাকেট আদালতে ২০০৮ চনত হত্যাৰ বলি হোৱা সাংবাদিক সৌম্য বিশ্বনাথনৰ হত্যাকাণ্ডৰ গোচৰত ৫জন লোকক দোষী সাব্যস্ত কৰে।
আদালতে ৪ জন লোকক হত্যা আৰু এজনক সহায়-সহযোগ কৰাৰ বাবে দোষী সাব্যস্ত কৰে।
ৰবি কাপুৰ, অমিত শুক্লা, বলজিৎ মল্লিক আৰু অক্ষয় কুমাৰক হত্যা আৰু লুণ্ঠনৰ গোচৰত দোষী সাব্যস্ত কৰা হয়। আনহাতে অজয় শ্বেট্টীক আন ৪ জনক সহায় কৰাৰ বাবে দোষী সাব্যস্ত কৰা হয়।
আদালতৰ ৰায়দানৰ পিছত সংবাদ মাধ্যমৰ সন্মুখত সৌম্যাৰ মাতৃয়ে কয় যে, “মই মোৰ ছোৱালীক হেৰুৱালোঁ। তাইক কাহানিও মই ঘূৰাই নাপাম। কিন্তু অভিযুক্তক কঠোৰ শাস্তি দিলে ভৱিষ্যতে আনে নৃশংস কাণ্ড সংঘটিত কৰাৰ আগতে চিন্তা কৰিব।”
উল্লেখ্য যে, ২০০৮ চনৰ ৩০ ছেপ্টেম্বৰত ২৫ বছৰীয়া সৌম্য বিশ্বনাথনে কৰ্মস্থলীৰ পৰা ঘৰলৈ উভতি আহিছিল। তেওঁ সেই সময়ত হেডলাইন টুডেত সাংবাদিকতা কৰি আছিল। দিল্লীৰ বসন্ত বিহাৰৰ পৰা উভতি অহাৰ সময়ত ৫ জন লোকে তেওঁৰ গাড়ীখন ঘেৰাও কৰি তেওঁক হত্যা কৰে।
২০০৯ চনত আৰক্ষীয়ে দাখিল কৰা ৬২০ পৃষ্ঠাৰ অভিযোগনামা অনুসৰি সাংবাদিক গৰাকীক ডকাইতিৰ উদ্দেশ্যে হত্যা কৰা হৈছিল।
