বোলছবি জগতৰ অভিনেতা-অভিনেত্ৰী বুলিলে অনুৰাগীৰ থাকে পাৰভঙা উছাহ। প্ৰিয় তাৰকাগৰাকীৰ বাবে এই অনুৰাগীসকলে নানা ধৰণৰ কাৰ্য কৰাৰ নিদৰ্শন সততে পোৱা যায়। এনেদৰেই বলীউডৰ তাৰকা অভিনেতা সঞ্জয় দত্তৰ মৰমত বান্ধ খাই এগৰাকী মহিলাই কৰিছে এক আশ্চৰ্যকৰ কাৰ্য।
এই মহিলাগৰাকীয়ে নিজৰ জীৱনৰ সমস্ত উপাৰ্জন তথা সঞ্চয় উইল কৰি গৈছে প্ৰিয় অভিনেতা সঞ্জয় দত্তৰ নামত। এই সম্পত্তিৰ পৰিমাণ শুনিলে চকু কপালত উঠিব আপোনাৰো। মহিলাগৰাকীয়ে নিজৰ অগাধ সম্পত্তিৰ লগতে বেংকৰ লকাৰত থকা অলংকাৰো সঞ্জয় দত্তৰ নামত কৰি গৈছে।
এই বিশাল সম্পত্তিৰ পৰিমাণ প্ৰায় ৭২ কোটি টকা। এই বৃহৎ পৰিমাণৰ সম্পত্তি অভিনেতাগৰাকীৰ নামত দি যোৱাৰ আঁৰত তেওঁৰ নাই কোনো স্বাৰ্থ। কেৱল মাত্ৰ এগৰাকী অনুৰাগী হিচাপেই প্ৰিয় অভিনেতাগৰাকীক তেওঁ দি গৈছে এই সম্পত্তি।
জানিব পৰা মতে, এই মহিলাগৰাকীৰ নাম নিশা পাটিল। দুৰাৰোগ্য ৰোগত আক্ৰান্ত হৈ ৬২ বছৰ বয়সত তেওঁৰ মৃত্যু হয়। মৃত্যুৰ আগতে তেওঁ উইল কৰি নিজৰ সকলো সম্পত্তি নিজৰ প্ৰিয় অভিনেতাগৰাকীক উইল কৰি দিছিল।
তেওঁৰ মৃত্যুৰ পিছতে এদিন সঞ্জয় দত্তই আৰক্ষীৰ পৰা ফোনকল লাভ কৰে। আৰক্ষীৰ জৰিয়তে সঞ্জয় দত্তই এই কথা জানিব পাৰে। ভালদৰে সোধ-পোছ কৰাৰ পিছত মহিলাগৰাকীৰ পৰিয়ালৰ কোনো সদস্যই এই ইচ্ছাৰ বিষয়ে জ্ঞাত নহয় বুলি সঞ্জয় দত্তই জানিব পাৰে আৰু পৰিয়ালৰ লোকৰ হাতত সকলো সম্পত্তি গতাই দিয়ে।
