পুনৰ সভ্য সমাজৰ মানৱতাক লজ্জিত কৰা এটি অমানৱীয় ঘটনা সংঘটিত হৈছে তিনিচুকীয়া জিলাৰ মাৰ্ঘেৰিটাত।
মাৰ্ঘেৰিটা থানাৰ অন্তৰ্গত আলুবাৰী টুলু ইটা ভাটাৰ সমীপৰ ঘাইপথৰ কাষতে থকা এখন পথাৰৰ মাজত কলপাতত মেৰিয়াই থোৱা অৱস্থাত এটি সদ্যোজাত কন্যা শিশু উদ্ধাৰ হয়।
স্থানীয় এজন লোকে শিশুটিক প্ৰথম অৱস্থাত প্ৰত্যক্ষ কৰে। ইয়াৰ পিছতে স্থানীয় ৰাইজে কোনো হৃদয়হীন মাতৃয়ে পেলাই থৈ যোৱা বুলি সন্দেহ কৰি ঘটনা সন্দৰ্ভত আৰক্ষীক খবৰ দিয়ে।
আৰক্ষীয়ে তাৎক্ষণিকভাৱে ঘটনাস্থলীত উপস্থিত হৈ কন্যা শিশুটিক উদ্ধাৰ কৰি মাৰ্ঘেৰিটা অসামৰিক চিকিৎসালয়ত ভৰ্তি কৰে। বৰ্তমান শিশুটিক শিশু কেয়াৰ য়ুনিটত ৰখা হৈছে।
নৱজাতক কন্যা সন্তানটিক উদ্ধাৰ কৰা ব্যক্তিজনে শিশুটিৰ দায়িত্ব গ্ৰহণ কৰাৰ ইচ্ছা প্ৰকাশ কৰিছে। অৱশ্যে প্ৰশাসনৰ ফালৰ পৰা এই ক্ষেত্ৰত বৰ্তমানলৈকে কোনো নিশ্চিয়তা প্ৰদান কৰা নাই।
আনহাতে স্থানীয় ৰাইজে এইয়া অবৈধ সম্বন্ধৰ ফল গাপ দিয়াৰ চেষ্টা বুলি অভিযোগ উত্থাপন কৰি এনে কাৰ্যক গৰিহণা দিয়ে।
