চহৰত বৰষুণ
————
ধাৰাসাৰ বৰষুণ ৷
উটুৱাই নিব নেকি
চহৰীয়া ভুলবোৰ
পানীত ককবকাই থকা খংবোৰ ?
কিন্তু যিসকলে পানীপৰুৱাৰ দৰে
ককবকাই আছে
উটি যাবনে তেওঁলোকৰ দুঃখবোৰো
নে পানীয়ে-বামে উভচৰ হৈ
থাকিব তেওঁলোক ৷
দোষ কাৰ?
নাগৰিকৰ নে নগৰ পৰিকল্পনাৰ?
নে সকলোৰে উদাসীনতাৰ?
যিসকলে পানীত ওপঙিছে
তেওঁলোক এতিয়া মাত মাতি মাতি
বোবা ৷
বৈদ্যুতিন পর্দাত
চঞ্চল ছবিৰ কথকতা
তেওঁলোকৰ ভগা হাড়ত
সাময়িক ভেঙুচালি ৷
বৰষুণে ৰিমজিম গান
ইয়াত নাগায় ৷
কেৱল মানুহৰ সমূহীয়া ভুলত
বিদ্রুপৰ তবলা বজায় ৷
—
