আমেৰিকা যুক্তৰাষ্ট্ৰৰ কংগ্ৰেছৰ উচ্চ সদন চিনেটে শুকুৰবাৰে এটা প্ৰস্তাৱ গৃহীত কৰে যে অৰুণাচল প্ৰদেশ ভাৰতৰ এক অবিচ্ছেদ্য অংগ। চীনৰ সৈতে আমেৰিকাৰ বৰ্ধিত প্ৰতিদ্বন্দিতাৰ পৰিপ্ৰেক্ষিতত বিধেয়কখনে বিশেষ গুৰুত্ব বহন কৰিছে।
আমেৰিকা যুক্তৰাষ্ট্ৰৰ আকাশত চীনা বেলুনক লৈ দুয়োখন দেশৰ মাজত কেইবা সপ্তাহ ধৰি বিবাদ চলি আছে। ইয়াৰ মাজতে আমেৰিকা যুক্তৰাষ্ট্ৰৰ চিনেটৰ এই প্ৰস্তাৱটোৱে ভাৰতৰ সীমান্তত ‘চীনৰ উচটনি’ক তীব্ৰ সমালোচনা কৰিছে।
অৰেগনৰ ডেম’ক্ৰেটিক চিনেটৰ জেফ মাৰ্কেল, টেক্সাচৰ ৰিপাব্লিকান চিনেটৰ জন কৰ্ণিন আৰু টেনেচীৰ ৰিপাব্লিকান চিনেটৰ বিল হেগৰ্টিয়ে অনা এই বিধেয়কত কোৱা হৈছে, “আমেৰিকাই সদায় স্বাধীনতাৰ পক্ষত সমৰ্থন কৰি আহিছে। আন্তৰ্জাতিক সম্পৰ্কৰ ক্ষেত্ৰত আমেৰিকা যুক্তৰাষ্ট্ৰই প্ৰতিখন দেশৰ অখণ্ডতা আৰু সাৰ্বভৌমত্বক স্বীকৃতি দিয়ে। কিন্তু গণ প্ৰজাতন্ত্ৰী চীন ইয়াৰ বিপৰীত দিশে আগবাঢ়ে।”
চীন সম্পৰ্কীয় আমেৰিকা যুক্তৰাষ্ট্ৰৰ চিনেট কমিটিৰ মুৰব্বী চিনেটৰ মাৰ্কেলে কয়, “আমেৰিকা যুক্তৰাষ্ট্ৰৰ মনত কোনো সন্দেহ নাই যে অৰুণাচল প্ৰদেশ ভাৰতৰ এক অবিচ্ছেদ্য অংগ, গণপ্ৰজাতন্ত্ৰী চীনৰ নহয়। আমি অঞ্চলটোত শান্তি বজাই ৰখাৰ বাবে সমমনস্ক দেশসমূহৰ সৈতে একেলগে কাম কৰিম।‘’
প্ৰস্তাৱটোৱে ভাৰত-চীন সীমান্তত প্ৰকৃত নিয়ন্ত্ৰণ ৰেখাত (এলএচি) শান্তি ব্যাহত কৰাৰ ক্ষেত্ৰত চীনৰ ভূমিকাক স্পষ্টভাৱে সমালোচনা কৰে। কোৱা হৈছে, “অৰুণাচল প্ৰদেশত চীনে ভাৰতক হাৰাশাস্তি কৰে।‘’
প্ৰস্তাৱটোত চীনা উস্কানিৰ বিৰুদ্ধে ভাৰতৰ কাৰ্যকলাপ আৰু ভাৰতে অঞ্চলটোত নিজৰ ভূখণ্ড ৰক্ষা কৰাৰ পদ্ধতিকো প্ৰশংসা কৰা হৈছে।
অৰুণাচল প্ৰদেশৰ কিছু অংশক লৈ ভাৰত আৰু চীন দীৰ্ঘদিন ধৰি চলি থকা বিবাদত আবদ্ধ হৈ আছে। যোৱা বছৰ ডিচেম্বৰত অৰুণাচল প্ৰদেশৰ টাৱাঙত ভাৰত আৰু চীনা সৈন্যৰ মাজত সংঘৰ্ষ হৈছিল। এনে পৰিস্থিতিত যিহেতু বিষয়টো আমেৰিকা যুক্তৰাষ্ট্ৰৰ চিনেটত আলোচনা কৰা হৈছে, এয়া স্পষ্ট যে ৱাশ্বিংটনে ভাৰতলৈ ইয়াৰ সৈতে থিয় হ’বলৈ বাৰ্তা প্ৰেৰণ কৰি চীনৰ সৈতে কূটনৈতিক যুদ্ধত প্ৰৱেশৰ চেষ্টা কৰি আছে।
কূটনীতিবিদসকলে ধাৰণা কৰে যে প্ৰস্তাৱিত বিধেয়কৰ আমেৰিকা যুক্তৰাষ্ট্ৰৰ চিনেটত যথেষ্ট ৰাজনৈতিক গুৰুত্ব আছে। চীনা সেনাই সীমান্তৰ বিভিন্ন অঞ্চলত ইয়াৰ উপস্থিতি বৃদ্ধি কৰিছে, যাৰ ভিতৰত আছে পূব সীমান্তৰ অৰুণাচল আৰু পশ্চিম সীমান্তৰ লাডাখ। যোৱা কেইবছৰমানত ডোকলাম, পাংগং হ্ৰদ আৰু টাৱাঙত কেইবাবাৰো উত্তেজনাৰ সৃষ্টি হৈছিল।
