ঋতুস্ৰাৱৰ বাবে কৰিব নোৱাৰিলে নৱৰাত্ৰিৰ পূজা : চৰম হতাশাত বিষপান কৰি মৃত্যু মহিলাৰ

সমাজত এতিয়াও ঋতুস্ৰাৱক লৈ বহু কুসংস্কাৰ আৰু অস্পৃশ্যতা আছে। যিমান সজাগতা অভিযান চলালেও যেন এই সজাগতাৰ বাৰ্তা পৰাগৈ নাই একাংশ ব্যক্তিৰ কাণত। কাণত পৰিলেও যেন ঋতুস্ৰাৱক লৈ থকা অন্ধবিশ্বাসৰ গণ্ডীৰ পৰা ওলাই আহিব পৰা নাই এইসকল লোক।

উত্তৰ প্ৰদেশত সংঘটিত হৈছে এক চাঞ্চল্যকৰ ঘটনা। এগৰাকী মহিলাই নিজৰ ঘৰত আয়োজন কৰিছিল নৱৰাত্ৰিৰ পূজা। কিন্তু মহিলাগৰাকীৰ ঋতুস্ৰাৱ হোৱাৰ বাবে পূজা অনুষ্ঠিত কৰিব নোৱাৰিলে। যাৰ ফলত চৰম হতাশাত ভুগি আত্মহত্যাৰ পথ বাচি লয় মহিলাগৰাকীয়ে।

জানিব পৰা মতে এই ঘটনা সংঘটিত হৈছে উত্তৰ প্ৰদেশৰ ঝান্সীত। মৃত মহিলাগৰাকীৰ নাম প্ৰিয়ংকা ছোনী। তেওঁৰ পৰিয়ালত আছিল তেওঁৰ স্বামী মুকেশ ছোনী আৰু দুগৰাকী কন্যা জাহ্নৱী আৰু মনৱী।

মুকেশে সংবাদ মাধ্যমৰ আগত কয়, “আৰম্ভণিৰে পৰা প্ৰিয়ংকা নৱৰাত্ৰিৰ প্ৰতি বৰ উৎসাহী আছিল। তাই মোক পূজাৰ বাবে সকলো বস্তু আনিবলৈ কৈছিল। মই সেইবোৰ লৈ আহিছিলো। কিন্তু নৱৰাত্ৰীৰ প্ৰথম দিনাই তাইৰ মাহেকীয়া আৰম্ভ হ’ল। তাই পূজা কৰিব নোৱাৰাৰ বাবে মনত বৰ দুখ পাইছিল। কিন্তু মই তাইক বহুত বুজাইছিলোঁ। মই তাইক কৈছিলোঁ যে এইটো এটা স্বাভাৱিক কথা।” ৷আৰক্ষীয়ে জনোৱা মতে, সেইদিনা যেতিয়া মুকেশ তেওঁৰ দোকানলৈ গৈছিল তেতিয়া প্ৰিয়ংকাই বিষ সেৱন কৰিছিল। বিষ সেৱন কৰি প্ৰিয়ংকা অচেতন হৈ মজিয়াত পৰি আছিল। প্ৰিয়ংকাক দেখাৰ লগে লগে পৰিয়ালৰ লোকে চিকিৎসালয়লৈ লৈ যায়। কিন্তু চিকিৎসাধীন অৱস্থাতে তেওঁৰ মৃত্যু হয়। প্ৰিয়ংকাৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰা হৈছে বুলিও আৰক্ষীয়ে জানিবলৈ দিয়ে। ঘটনা সন্দৰ্ভত তদন্ত অব্যাহত আছে।