আজি ১১ নৱেম্বৰ দেওবাৰে পুৱা কামৰূপ জিলাৰ ছয়গাঁও আৰক্ষী থানাৰ অন্তৰ্গত গুবলি আমবাৰী গাঁৱত এহাল কম বয়সীয়া দম্পতীৰ গছত ওলমি থকা মৃতদেহ উদ্ধাৰ হোৱাত অঞ্চলটোত তীব্ৰ চাঞ্চল্যৰ সৃষ্টি হৈছে।
আৰক্ষী সূত্ৰৰ পৰা জানিব পৰা অনুসৰি, মৃত দুজনক কৃষ্ণ মালাকৰ (২১) আৰু সাবালি দাস (১৮) বুলি চিনাক্ত কৰা হৈছে। তেওঁলোক গুৱাহাটীৰ ফটাশিল আমবাৰী এলেকাৰ বাসিন্দা আছিল বুলি জানিব পৰা গৈছে।
আৰক্ষীয়ে এয়া আত্মহত্যাৰ ঘটনা বুলি সন্দেহ কৰিছে। গুবলি আমবাৰী গাঁৱৰ বাসিন্দাসকলে মৃতদহদুটা প্ৰত্যক্ষ কৰি ছয়গাঁও আৰক্ষী থানাত খবৰ দিয়ে আৰক্ষীৰ উপস্থিতিত মৃতদেহ দুটা গছৰ পৰা নমাই মৰণোত্তৰ পৰীক্ষাৰ বাবে গুৱাহাটী চিকিৎসা মহাবিদ্যালয়লৈ প্ৰেৰণ কৰে।
ছয়গাঁও আৰক্ষীয়ে এই মৃত্যুৰ সন্দৰ্ভত অস্বাভাৱিক মৃত্যুৰ গোচৰ (নং(৩৪/১৮) ৰুজু কৰিছে। মৃত ছোৱালীগৰাকীৰ পৰিয়ালে এখন এজাহাৰ দাখিল কৰিছে।
সন্দেহ কৰা অনুসৰি দুয়োজনে শেষ নিশা ডিঙিত চিপজৰী লৈ আত্মহত্যা কৰিছিল। মৃতদেহদুটা উদ্ধাৰ হোৱা ঠাইখিনিলৈ মানুহ-দুনুহ সতকাই নাযায় বুলি স্থানীয় লোকে জনাইছে।
ছয়গাঁও আৰক্ষীৰ পৰা লাভ কৰা প্ৰাথমিক তথ্য অনুসৰি কৃষ্ণ আৰু সাবালিয়ে দুবছৰ পূৰ্বে বিবাহ বন্ধনত আৱদ্ধ হৈছিল। নৰ্থ ইষ্ট নাওৰ আগত এগৰাকী আৰক্ষী বিষয়াই প্ৰকাশ কৰা অনুসৰি, ছোৱালীজনী সেই সময়ত নাবালিকা আছিল বাবে তেওঁৰ পৰিয়ালৰ লোকে এই বিবাহত অনুমোদন জনোৱা নাছিল।
