দিল্লীৰ আপৰ বিধায়িকা আতিশী মাৰ্লিনাৰ লগতে দলীয় মুখপাত্ৰ ক’ৰ’না আক্ৰান্ত
দেশৰ ৰাজধানী দিল্লীত ভয়াবহ হাৰত বৃদ্ধি পাইছে ক’ৰ’না ভাইৰাছৰ সংক্ৰমণ।
বুধবাৰে আম আদমী পাৰ্টিৰ বিধায়ক আতিশী মাৰ্লিনা, মুখপাত্ৰ অক্ষয় মাৰাথে আৰু উপদেষ্টা অভিনন্দিতা দায়াল মাথুৰৰ শৰীৰত মাৰাত্মক ক’ৰ’না ভাইৰাছৰ উপস্থিতি ধৰা পৰিছে।
বিধায়ক আতিশী মাৰ্লিনাই বৰ্তমান নিজ গৃহতে আইছ’লেশ্যনত আছে আৰু চিকিৎসকৰ পৰামৰ্শ অনুসৰি চিকিৎসা গ্ৰহণ কৰি আছে।
বিগত লোকসভা নিৰ্বাচনত আতিশীয়ে বিজেপিৰ গৌতম গম্ভীৰৰ বিৰুদ্ধে প্ৰতিদ্বন্দ্বিতা কৰি পৰাস্ত হৈছিল।
ইয়াৰ পূৰ্বে শৰীৰত ক’ৰ’না ভাইৰাছত আক্ৰান্ত হোৱা সদৃশ লক্ষণ দেখা বাবে দিল্লীৰ মুখ্য মন্ত্ৰী অৰবিন্দ কেজৰিৱালৰ ক’ৰ’না পৰীক্ষা কৰা হৈছিল।
ক’ৰ’না পৰীক্ষাত কেজৰিৱাল ক’ৰ’নাত আক্ৰান্ত হোৱা নাই বুলি নিশ্চিত হয়।
আনহাতে, মঙলবাৰে দিল্লীৰ স্বাস্থ্য মন্ত্ৰী সত্যেন্দ্ৰ জৈনৰ শৰীৰতো ক’ৰ’নাৰ লক্ষণ দেখাৰ পাছত চিকিৎসালয়ত ভৰ্তি কৰোৱা হৈছিল।
উল্লেখযোগ্য যে, ৰাজধানী দিল্লীত ক’ৰ’না আক্ৰান্তৰ সংখ্যাই ৪৪০০০ অতিক্ৰম কৰিছে।
দেশৰ গৃহ মন্ত্ৰী অমিত শ্বাহে মুখ্য মন্ত্ৰী কেজৰিৱালৰ সৈতে বৈঠকত অংশগ্ৰহণ কৰি দিল্লীক ক’ৰ’নাৰ পৰা মুক্ত কৰাৰ বাবে নতুন ৰণকৌশল প্ৰস্তুত কৰি উলিয়াইছে।