একৈশ দিনীয়া লকডাউনত গৃহবন্দী কৃষ্ণাই অঞ্চলৰ বহু সম্বলহীন পৰিয়ালৰ বাবে যেন আশাৰ কিৰণ হৈ উজলি উঠিছে কৃষ্ণাই আঞ্চলিক ছাত্ৰ সন্থাৰ নেতৃত্ব ৷
কৃষ্ণাই আঞ্চলিক ছাত্ৰ সন্থাৰ বিষয়ববীয়াসকলে হেজাৰ ব্যস্ততাৰ মাজতো দুৰ্গত জনতাৰ মাজত চলাই গৈছে সাহায্য অভিযান ৷ সমান্তৰালকৈ তেওঁলোকে ৰাইজক কৰ’নাৰ বিষয়ে সজাগো কৰিছে।
ছাত্ৰ সন্থাৰ এই মহৎ কাৰ্যত সহায় কৰিছে স্থানীয় এদল যুৱকে ৷
ছাত্ৰ সন্থাৰ নেতৃত্বতে বিগত ১৭ টা দিনে গোৱালপাৰা জিলাৰ কৃষ্ণাইৰ বিভিন্ন গাৱঁত সাহায্য প্ৰদান চলি আছে। অঞ্চলটোৰ বহু গাঁৱত সচেতন যুৱকেও ছাত্ৰ সংগঠন টোক এই সাহায্য বিতৰণত সহায় কৰি আহিছে।
খাদ্য সামগ্ৰীকে ধৰি অত্যাৱশ্যকীয় সামগ্ৰীৰ একোটিকৈ টোপোলা শনিবাৰে দলটোৱে পাইকান বৰজুলী গাঁৱত বিতৰণ কৰে ৷
ইপিনে, শনিবাৰে দুপৰীয়া ভাগত কৃষ্ণাই উন্নয়ন খণ্ডৰ গাণনিক সাধনা দেবীয়ে ৰাজ্য চৰকাৰৰ আহ্বান অনুসৰি পাইকান অঞ্চলৰ কেইবাজনো দুখীয়া লোকক কিছু পৰিমানে খাদ্য সামগ্ৰীৰ লগতে একাংশক নগদ ধনো প্ৰদান কৰে ৷
বিভিন্ন দল-সংগঠনৰ লগতে চৰকাৰী কৰ্মচাৰী সকলে অব্যাহত ৰখা এই সাহায্য অভিযানৰ ৰাইজে উচ্চ প্ৰশংসা কৰিছে ৷
