তেওঁৰ বিস্ফোৰক বেটিঙৰ ওপৰত নিৰ্ভৰ কৰিয়েই হায়দৰাবাদে ২৪৫ ৰানৰ বিশাল লক্ষ্য অতিক্ৰম কৰে। মাত্ৰ ৪০টা বলতে তেওঁ শতক অৰ্জন কৰে। যিটো আই পি এলৰ দ্বিতীয় দ্ৰুততম শতকো। আৰু সেই শতকৰ ঠিক পিছতেই অভিষেক শৰ্মাই পকেটৰ পৰা এখন কাগজৰ টুকুৰা উলিয়াই এক অভিনৱ উদযাপন কৰিলে।
ক’বলৈ গ’লে কেৱল তেওঁৰ কান্ধৰ ওপৰত নিৰ্ভৰ কৰিয়েই পঞ্জাবক পৰাস্ত কৰি হায়দৰাবাদে জয়ৰ সোৱাদ লাভ কৰে। কিন্তু তেওঁৰ কাগজৰ টোকাটোত কি আছিল? ইয়াক কেন্দ্ৰ কৰি আৰম্ভ হৈছে জল্পনা-কল্পনা।
পঞ্জাবে টছত জয়লাভ কৰি শনিবাৰে হায়দৰাবাদৰ ২২ গজৰ পিটচত বেটিং কৰিবলৈ সিদ্ধান্ত লয়। পঞ্জাৱৰ দুই অ’পেনাৰ প্ৰিয়ংশ (১৩ বলত ৩৬) আৰু প্ৰভশিমৰনে (২৩ বলত ৪২) হায়দৰাবাদৰ বলাৰৰ ওপৰত দমনীয়ভাৱে খেলিছিল।
তেওঁলোক আউট হ’লেও শ্ৰেয়াছ আয়াৰ আৰু নেহালৰ বেটিঙৰ ওপৰত নিৰ্ভৰ কৰি স্ক’ৰব’ৰ্ডখন ঘোঁৰাৰ দৰে দৌৰি থাকিল। ছামীয়ে ৪ অভাৰত ৭৫ ৰান দিয়ে। প্ৰথম ইনিংছৰ শেষত পঞ্জাৱৰ স্ক’ৰ ৬ উইকেটত ২৫৪ ৰান হয়।
এই বিশাল লক্ষ্য খেদি জিকাটো হায়দৰাবাদৰ বাবে যথেষ্ট কঠিন আছিল, আনকি ঘৰুৱা খেলপথাৰতো। কিন্তু অভিষেক শৰ্মা আৰু ট্ৰেভিছ হেডে এই কঠিন কাম সহজ কৰি তুলিলে। এই দুগৰাকী তাৰকাই অৰ্শ্বদীপ সিং, মাৰ্কো জান্সেন আৰু চাহালক সাধাৰণ বলাৰৰ পৰ্যায়লৈ নমাই দিয়ে।
হেডে ৩৭ বলত ৬৬ ৰান সংগ্ৰহ কৰি যুজবেন্দ্ৰ চাহালৰ বলত মেক্সৱেলক কেচ দি উভতি যায়। অৱশ্যে পূৰ্বৰ ৫ খন মেচত ব্যৰ্থ হোৱাৰ পিছত অভিষেক এইবাৰ উজলি উঠা দেখা গ’ল। মাত্ৰ ৪০টা বলত শতক অৰ্জন কৰাৰ পিছত তেওঁক এক অভিনৱ উদযাপন কৰা দেখা গৈছিল।
শতক অৰ্জন কৰাৰ পিছত অভিষেক শৰ্মাই পকেটৰ পৰা কাগজ এটুকুৰা উলিয়াই আনিলে। যিখন কাগজত লিখা আছিল এই ইনিংছটো অৰেঞ্জ আৰ্মীৰ বাবে। অৰ্থাৎ অভিষেক শৰ্মাই এই শতকীয় ইনিংছটো হায়দৰাবাদৰ অনুৰাগীৰ বাবে উৎসৰ্গা কৰিছিল।
অভিষেকক যেতিয়া অৰ্শদীপ সিঙে আউট কৰিছিল তেতিয়া স্ক’ৰব’ৰ্ডত আছিল ২২২ ৰান। ৫৫ বলত ১০টা ছয় আৰু ১৪টা চাৰিৰে অভিষেকে অকলেই ১৪১ ৰান কৰে। জয়ৰ লক্ষ্যত উপনীত হ’বলৈ বাকী আছিল মাত্ৰ ২৪ ৰান। এই কামৰ দায়িত্ব লয় হেনৰিক ক্লাচেন আৰু ঈশান কিষানে।
