উত্তৰ প্ৰদেশৰ কানপুৰত সংঘটিত হৈছে চকু কপালত তোলা আন এক ঘটনা। এটি নাবালকৰ গাড়ীৰ খুন্দাত থিতাতে নিহত হৈছে এগৰাকী নিৰীহ মহিলা। হাস্পাতালত মৃত্যুৰে যুঁজিছে আন এগৰাকীয়ে।
ইতিমধ্যে সামাজিক মাধ্যমত ভাইৰেল হৈ পৰিছে এই দুৰ্ঘটনাৰ চিচি টিভি ফুটেজ। ফুটেজত দেখা গৈছে যে দুৰ্ঘটনা সংঘটিত হোৱাৰ সময়ত গাড়ী চলাইছিল এটি নাবালকে।
এই দুৰ্ঘটনাত এগৰাকী মহিলাৰ মৃত্যু হোৱাৰ লগতে গুৰুতৰভাৱে আঘাতপ্ৰাপ্ত হৈছে মহিলাগৰাকীৰ কন্যা।
ঘটনাৰ বিৱৰণ অনুসৰি ৰাতিপুৱা সাত বজাত এগৰাকী মহিলা আৰু তেওঁৰ কন্যাই স্কুটি লৈ বজাৰলৈ বুলি ওলাই আহিছিল।
ভাইৰেল হোৱা চিচিটিভি ফুটেজত দেখা গৈছে যে মহিলাগৰাকীয়ে স্কুটিখন অতি লাহে লাহে চলাই আহিছিল। কিন্তু হঠাৎ এখন অসাৱধান বেগী চাৰিচকীয়া বাহন আহি স্কুটীত খুন্দা মাৰে। থিতাতে মৃত্যু হয় মহিলাগৰাকীৰ। সংকটজনক অৱস্থাত তেওঁৰ কন্যাক উদ্ধাৰ কৰা হয়। এতিয়া তেওঁ চিকিৎসালয়ত কাৰ্যতঃ মৃত্যুৰ সৈতে যুঁজি আছে।
আৰক্ষীৰ তথ্য অনুসৰি গাড়ীখন চলাই আছিল এটি ১৭ বছৰীয়া নাবালকে। নাবালকে গাড়ীখন ষ্টান্ট কৰি নিয়ন্ত্ৰণ হেৰুৱাই মহিলাগৰাকীৰ স্কুটিত খুন্দা মাৰে।
প্ৰত্যক্ষদৰ্শীৰ মতে গাড়ীখনে তেওঁলোকক ইমান জোৰেৰে খুন্দা মাৰে যে দুয়ো উফৰি পৰে। চিকিৎসালয়ৰ সূত্ৰ অনুসৰি মহিলাগৰাকীৰ কন্যাই মূৰত গুৰুতৰভাৱে আঘাত পাইছে।
আনহাতে, ১৭ বছৰীয়া নাবালকজনক গ্ৰেপ্তাৰ কৰে আৰক্ষীয়ে। তেওঁক জেৰা কৰা হৈছে। কাৰ গাড়ী চলাইছিল, কোনে চলাবলৈ অনুমতি দিছিল, সেই কথা জানিবলৈ চেষ্টা কৰিছে আৰক্ষীয়ে।
