ভাৰতৰ অন্যতম ঐতিহাসিক কূটনীতিবিদ আৰু ৰাজনৈতিক ব্যক্তিত্ব আচাৰ্য চাণক্যই তেওঁৰ চাণক্য নীতি (Chanakya Niti)ত এই বিশেষ চৰিত্ৰৰ বন্ধুত্বৰ প্ৰতি সাৱধান হ’বলৈ অনুৰোধ জনাইছে।
তেওঁ কয় যে বন্ধুত্বৰ ক্ষেত্ৰত আমি সদায় সাৱধান হোৱা উচিত। এই সন্দৰ্ভত কিছু পৰামৰ্শও দিছে। তেওঁ কয় যে বন্ধুত্বৰ ক্ষেত্ৰত এইবোৰ কথা অনুসৰণ কৰিলে তেওঁৰ জীৱনটো বিপদমুক্ত হয়। তেওঁৰ মতে জীৱনত সফল হ’ব বিচাৰিলে বন্ধু-বান্ধৱী আৰু আত্মীয়-স্বজন বাছনি কৰাত যত্ন লোৱা উচিত। কাৰণ এজন মানুহ তেতিয়াহে বিফল হয় যেতিয়া তেওঁৰ আপোনজনে তেওঁক বিশ্বাসঘাতকতা কৰে।
চাণক্যই কয়, এজন প্ৰকৃত বন্ধুক বিপদত পৰিলেহে চিনি পাব পাৰি কাৰণ বন্ধু এজনে কেতিয়াও বন্ধুক অকলে বিপদত এৰি নাযায়। বিপদত পৰিলে তেওঁ নিজেই আগবাঢ়ি আহিব। আপোনাৰ বিপদত আপোনাৰ কাষত নথকা ব্যক্তি আপোনাৰ বন্ধু নহয়।
চাণক্যৰ মতে সদায় ধন-সম্পত্তি আৰু প্ৰতিপত্তি বিচাৰি বন্ধুত্ব কৰা ব্যক্তিক পৰিহাৰ কৰা উচিত। কাৰণ আপোনাৰ ধন-সম্পত্তি আৰু ক্ষমতা নাথাকিলে তেওঁলোকে আপোনাক এৰি যাবলৈ অকণো কুণ্ঠাবোধ নকৰে।
মিছলীয়াক কেতিয়াও বন্ধু হিচাপে গ্ৰহণ নকৰিবলৈও পৰামৰ্শ দিছে আচাৰ্য চাণক্যই। তেওঁৰ মতে যিয়ে নিজৰ লাভৰ বাবে মিছা ক’ব পাৰে তেওঁ নিজৰ বাবে আপোনাৰ ওচৰত বা আপোনাৰ বিষয়েও মিছা ক’ব পাৰে। চাণক্যই যিমান পাৰি শীঘ্ৰে এই মানুহবোৰৰ পৰা আঁতৰি যাবলৈ উপদেশ দিছে।
