নাটকৰ প্ৰতি আসক্তি। সন্মুখত শ শ দৰ্শক বহি আছিল যদিও কোনো দ্বিধা নাই। লক্ষ্য আছিল একক চৰিত্ৰক চিত্ৰিত কৰা। যিদৰে ভাবিছিল তেনেকৈয়ে কৰা হ’ল কামটো। এটা জীয়া গাহৰি হত্যা কৰি মঞ্চত কেঁচা মাংস চোবাই খালে অভিনেতাজনে। এনে এটা দৃশ্য চৰ্চালৈ অহাৰ পাছতে দৰ্শকৰ মাজত চৰম আতংক বিয়পি পৰিল।
ইয়াৰ পাছত আৰক্ষীয়ে গ্ৰেপ্তাৰ কৰে বিম্বাধৰ গৌড়া নামৰ ৪৫ বছৰীয়া অভিনেতা এজনক। এই ঘটনাক লৈ ওড়িশাত হুলস্থুলৰ সৃষ্টি হৈছে। ৰাজনৈতিক হেঁচা আৰম্ভ হৈছে। মঞ্চত জীয়াই থকা জীৱ-জন্তু খোৱাৰ ঘটনাক তীব্ৰ গৰিহণা দিছে বিজেপিয়ে। গেৰুৱা শিবিৰেও দোষীৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে।
সূত্ৰ অনুসৰি, যোৱা ২৪ নৱেম্বৰত ওড়িশাৰ গঞ্জাম জিলাত এনে এক ঘটনা সংঘটিত হৈছিল। তাত থকা হিঞ্জীলি থানাৰ অন্তৰ্গত ৰালাব গাঁৱত এক অনুষ্ঠানৰ আয়োজন কৰা হয়। তাতেই নাটকখন মঞ্চস্থ কৰা হয়। আৰক্ষীৰ সূত্ৰ অনুসৰি অভিনেতাসকলে মঞ্চত সজীৱ সাপ আৰু গাহৰি লৈ দৰ্শকক মনোৰঞ্জন দিয়ে। কিন্তু গাহৰিটো ওলমি আছিল।
তাৰ পাছত পৰিবেশন কৰি থাকোঁতে তেওঁ বনৰীয়া গাহৰিটোক দাৰে হত্যা কৰি দৰ্শকক আচৰিত কৰি তুলিলে। কিন্তু তাৰ পাছত অভিনেতাজনে কেঁচা গাহৰিৰ মাংস চোবাই খাবলৈ ধৰিলে। ভয়ংকৰ দৃশ্যটো দেখি সকলোৱে স্তম্ভিত হৈ পৰিল। ইয়াৰ পাছতে অভিনেতাজনৰ বিৰুদ্ধে ক্ষোভ উজাৰিলে দৰ্শকে।
ইয়াৰ পাছতে গোচৰ ৰুজু কৰা হয়। ঘটনাৰ তদন্তৰ অন্তত অভিনেতাজনক গ্ৰেপ্তাৰ কৰে আৰক্ষীয়ে। তদন্তকাৰীয়ে জনোৱা মতে, সাপটোৰ সৈতে মঞ্চত উঠা অভিনেতাজনকো গ্ৰেপ্তাৰ কৰা হ’ব। অৱশ্যে ঘটনাৰ পিছৰে পৰা অভিনেতাজনক বিচাৰি পোৱা নাই। ওড়িশাৰ বিভিন্ন ঠাইত তেওঁৰ সন্ধান আৰম্ভ হৈছে।
