হলীউডত অসম ভূমিৰ নাম উজলোৱা অসম গৌৰৱ আদিল হুছেইন পুনৰ জিলিকি উঠিল আন্তঃৰাষ্ট্ৰীয় মঞ্চত।
ক’ৰ’ণাতংকৰ বাবেই শেহতীয়াকৈ অনলাইন যোগে অনুষ্ঠতি হোৱা লণ্ডন ইণ্ডিয়া ফিল্ম ফেষ্টিভেলত অসমৰ সুযোগ্য সন্তান আদিল হুছেইনে লাভ কৰিলে আউটষ্টেণ্ডিং এচিভমেন্ট এৱাৰ্ড।
ব্ৰিটেইন আৰু ইউৰোপৰ সৰ্ববৃহৎ চলচ্চিত্ৰ মহোৎসৱ লণ্ডন ইণ্ডিয়া ফিল্ম ফেষ্টিভেলত এইবেলি আদিল হুছেইনৰ উপৰি আন ভালে কেইগৰাকী ভাৰতীয় অভিনেতা-অভিনেত্ৰীয়ে সন্মান লাভ কৰিবলৈ সক্ষম হৈছে।
অসম সন্তান আদিল হুছেইনে ছবি জগতলৈ আগবঢ়োৱা অনবদ্য অৱদানৰ বাবে আউটষ্টেণ্ডিং এচিভমেন্ট এৱাৰ্ড লাভ কৰিবলৈ সক্ষম হৈছে।
উল্লেখ্য লণ্ডন ইণ্ডিয়া ফিল্ম ফেষ্টিভেল বাগ্ৰী ফাউণ্ডেছন আৰু ব্ৰিটিছ ফিল্ম ইনষ্টিটিউটৰ উদ্যোগত অনুষ্ঠিত হৈ আহিছে।
এই মহোৎসৱত এই বেলি প্ৰখ্যাত অভিনেত্ৰী দীপা মেহতা আৰু শ্বাৱানা আজমীক আইকন এচিভমেন্ট বঁটাৰে সন্মানিত কৰা হয়।
লণ্ডন ইণ্ডিয়া ফিল্ম ফেষ্টিভেলত এইবেলি আদিল হুছেইনৰ উপৰি আন দুগৰাকী জনপ্ৰিয় অভিনয় শিল্পী ক্ৰমে ফ্ৰেইজ পিন্ট’ আৰু বিদ্যা বালানক আউটষ্টেণ্ডিং এচিভমেন্ট এৱাৰ্ড আগবঢ়োৱা হয়।
অনলাইন যোগে অনুষ্ঠিত চলচ্চিত্ৰ মহোৎসৱত মীৰা নায়াৰৰ মিছিছিপি মচালা ছবি খনে অডিয়েন্স ফেভাৰিট এৱাৰ্ড লাভ কৰে।
মীৰা নায়াৰৰ ছবি খনত অভিনয় কৰিছে ডেনজেল ৱাশ্বিংটন আৰু সৰিতা চৌধুৰীয়ে।
