চৰকাৰে আদিবাসীসকলক জনজাতিকৰণৰ মৰ্যাদা আৰু ভূমি পট্টা প্ৰদান কৰিব নে নাই সেয়া শীঘ্ৰে স্পষ্ট কৰিবলৈ আদিবাসী জাতীয় মহাসভাই দাবী জনাইছে ৷
বৃহত্তৰ বঙাইগাঁও প্ৰেছ ক্লাবত আয়োজিত এক সংবাদমেলত আদিবাসীসকলৰ সংগ্ৰামী মঞ্চ আদিবাসী জাতীয় মহাসভাৰ সাধাৰণ সম্পাদক বীৰসিং মুণ্ডাই কয় যে চৰকাৰে নিৰ্বাচনৰ পূৰ্বে কেৱল এটা নিৰ্দিষ্ট সময়ত জনজাতিকৰণ আৰু ভূমি পট্টা প্ৰদানৰ কথা কয় ৷ নিৰ্বাচন শেষ হোৱাৰ পিচত চৰকাৰ গঠন কৰি প্ৰতিশ্ৰুতি বোৰ পাহৰি যায় ৷ সেয়ে আদিবাসী জাতীয় মহাসভাই আন্দোলন কৰাৰ বাহিৰে আৰু আন কোনো পথ নাই বুলি তেওঁ মন্তব্য কৰে।
অহা সাত মাৰ্চৰ পৰা জিলা ভিত্তিত উপায়ুক্ত কাৰ্যালয়ৰ সন্মুখত তিনি ঘণ্টীয়া ধৰ্ণা কাৰ্যসূচী ৰূপায়ণ কৰি গণতান্ত্ৰিক আন্দোলন আৰম্ভ কৰিব বুলি নেতাগৰাকীয়ে প্ৰকাশ কৰে।
সংবাদ মেলত সাধাৰণ সম্পাদক মুণ্ডাই কয় যে অসমৰ আদিবাসী জাতীয় সংগঠন সমুহৰ একমাত্ৰ ঐক্যমঞ্চ আদিবাসী জাতীয় মহাসভাই ২০১১ চনৰে পৰাই অসমৰ আদিবাসী সকলৰ জনজাতিকৰণ আৰু ভূমি পট্টা প্ৰদানৰ দাবীত গণতান্ত্ৰিক আন্দোলন গ্ৰহণ কৰি আহিছে যদিও তেওঁলোকৰ দাবীৰ প্ৰতি চৰকাৰে তিলমানো গুৰুত্ব দিয়া নাই ৷
জাতীয় সংগঠন তথা যুদ্ধবিৰত থকা আদিবাসী সংগঠনসমুহে বিভিন্ন ৰাজনৈতিক ষড়যন্ত্ৰৰ বলি হ’বলগীয়া হ’ল ৷ ২০১৯ চনৰ ৯ জানুৱাৰীত ৰাজ্যসভাত উত্থাপন হোৱা জনজাতিকৰণৰ বিধেয়কখন আজি পাহৰণিৰ গৰাহত বুলিও তেওঁ খেদ প্ৰকাশ কৰে।
সংবাদমেলত আদিবাসী জাতীয় মহাসভাৰ সভাপতি (সংগ্ৰামী মঞ্চ) বয়ল হেব্ৰম, আহ্বায়ক চাইমন কিস্কু, সহকাৰী সাধাৰণ সম্পাদক হোপ্না চৰেনৰ লগতে জেএছবিৰ সভাপতি ডেনিয়েল হাছদা, মনজিৎ কিস্কু, জ’নচ তপ্প, ৰমেশ তপ্প, হিতেশ চৰেন ,মৃনাল কুজুৰ আদি ব্যক্তিসকল থাকে।
