‘’নাগৰিকত্ব সংশোধনী বিধেয়ক ২০১৬’ গৃহীত হ’লে চৰকাৰৰ পৰা পৰা ওলাই আহিব ৩০ জন বিজেপি বিধায়ক। জাতিধ্বংসী বিধেয়কখনৰ বাবেই অগপৰ সৈতে ইতিমধ্যে বিজেপিৰ মিত্ৰতা ভংগ হৈছে, কেৱল আনুষ্ঠানিক ঘোষণাহে বাকী।‘’
দ্বিতীয় পৰ্যায়ৰ পঞ্চায়ত নিৰ্বাচনৰ প্ৰচাৰ অভিযানৰ শুকুৰবাৰে অন্তিম দিনটোত নলবাৰীৰ ঘগ্ৰাপাৰ চ’কত অনুষ্ঠিত অসম গণ পৰিষদৰ নিৰ্বাচনী প্ৰচাৰ সভাত এই বিস্ফোৰক মন্তব্য কৰে কমলপুৰৰ বিধায়ক তথা অগপ নেতা সত্যব্ৰত কলিতাই।
নলবাৰী জিলা অগপ সভাপতি আনন্দ ৰাজবংশীৰ সভাপতিত্বত অনুষ্ঠিত সভাখনত অগপ নেতা কলিতাই স্পষ্টভাৱে কয় যে বিজেপিৰ লগত অগপৰ মিত্ৰতা ইতিমধ্যে ভংগ হৈছে, মাত্ৰ আনুষ্ঠানিকভাৱেহে এই কথা ঘোষণা কৰিবলৈ বাকী আছে।
আনহাতে, কমলপুৰৰ বিধায়কগৰাকীয়ে এক বিস্ফোৰণ ঘটাই সদৰী কৰে যে আমি চৰকাৰৰ পৰা ওলাই আহিব নালাগে, তেওঁলোকহে ওলাই যাব লাগিব। নাগৰিকত্ব সংশোধনী বিধেয়ক গৃহীত হ’লে ৩০ জন বিধায়ক বিজেপিৰ পৰাই ওলাই আহিব আৰু আমিহে চৰকাৰ গঠন কৰিম।
ইপিনে, বাইক ৰেলীত অংশ লোৱা শতাধিক দলীয় কৰ্মীৰ আগত কলিতাই বিজেপি নেতা ড০ হিমন্ত বিশ্ব শৰ্মাই আঢ়ৈ বছৰত কেনেকৈ কংগ্ৰেছক পাহৰিব বুলি কটাক্ষ কৰাৰ লগতে কয় যে হিমন্ত বিশ্ব শৰ্মাৰ গাত কংগ্ৰেছৰ তেজ আছে।
তেওঁ লগতে কয় যে হিমন্ত বিশ্বই তৰুণ গগৈকহে বেয়া পায় ,কংগ্ৰেছক নহয়। সেইবাবেই তেওঁ কংগ্ৰেছক বেয়াকৈ নকয় কিন্তু তৰুণ গগৈ আৰু অগপকহে সমালোচনা কৰে।
