দুই বন্ধুৰ সৈতে গাড়ীৰে ফুৰিবলৈ যোৱা অৱস্থাত মৃত্যু হয় এগৰাকী বিমান পৰিচাৰিকাৰ। বৃহস্পতিবাৰে নিশা এটা পুখুৰীত ডুব যোৱা গাড়ীৰ পৰা উদ্ধাৰ কৰা হয় তেওঁৰ মৃতদেহ। মধ্য প্ৰদেশৰ ভূপালত সংঘটিত হৈছে এই ঘটনা।
আৰক্ষীয়ে জনোৱা মতে, মৃত যুৱতীগৰাকীৰ নাম হৰ্ষিতা শৰ্মা। বৃহস্পতিবাৰে হৰ্ষিতাই দুই বন্ধু জয় আৰু সুজলৰ সৈতে ফুৰিবলৈ ওলাই গৈছিল। প্ৰাথমিকভাৱে আৰক্ষীয়ে গম পাইছে যে জয়ে গাড়ীখন চলাই গৈছিল। হলি ক্ৰছ স্কুলৰ সমীপত গাড়ীৰ সন্মুখত দৌৰি আহি গ’ল এটা গৰু। আৰু তেতিয়াই জয়ে নিয়ন্ত্ৰণ হেৰুৱাই পেলালে। লগে লগে গাড়ীখন পোনে পোনে পুখুৰীটোৰ ভিতৰলৈ সোমাই যায়।
এই ঘটনাৰ পিছত জয় আৰু সুজল কেনেবাকৈ গাড়ীৰ পৰা ওলাই আহিল। কিন্তু মূৰৰ গুৰুতৰ আঘাতৰ বাবে হৰ্ষিতাই গাড়ীৰ পৰা ওলাব নোৱাৰিলে। পুখুৰীত গাড়ীখন ডুব যায়। স্থানীয় লোকে গাড়ীখন পুখুৰীত পৰি থকা দেখি উদ্ধাৰ কৰিবলৈ আহে। আৰক্ষীক খবৰ দিয়া হয়। আৰক্ষী আহি গাড়ীখন উঠাই আনিলে। গাড়ীৰ ভিতৰতে উদ্ধাৰ হয় হৰ্ষিতাৰ মৃতদেহ।
আৰক্ষীয়ে জনোৱা মতে, ২০২৩ চনত হৰ্ষিতাই ফ্লাইট এটেণ্ডেণ্টৰ প্ৰশিক্ষণ সম্পূৰ্ণ কৰিছিল।শেহতীয়াকৈ এয়াৰ ইণ্ডিয়া এক্সপ্ৰেছত চাকৰি পাইছিল। বৃহস্পতিবাৰে তেওঁ বেংগালুৰুৰ পৰা ভোপাললৈ উভতি আহে।
হৰ্ষিতা ভূপাললৈ ঘূৰি অহাৰ কথা তেওঁলোকে অৱগত নাছিল বুলি দাবী কৰে পৰিয়ালটোৱে। শুকুৰবাৰ আছিল হৰ্ষিতাৰ জন্মদিন। বুধবাৰে ফোন কৰি শুকুৰবাৰে ঘৰলৈ উভতি আহিব বুলি কয়। কিন্তু বৃহস্পতিবাৰে তেওঁ ভোপালত উপস্থিত হয়। হোটেল এখনত চেক ইন কৰে। তাৰ পৰা দুজন বন্ধুৰ সৈতে ফুৰিবলৈ ওলাই যায়।
