ৰাজ্য জুকাৰি যোৱা মহানগৰীৰ ঋতুপৰ্ণ পেগুৰ নৃশংস হত্যাকাণ্ডৰ ঘটনাক গৰিহনা দিয়াৰ লগতে হত্যাকাৰীক ফাঁচী দিয়াৰ দাবী জনাইছে AIUDF-ৰ মুৰব্বী মৌলানা বদৰুদ্দিন আজমলে।
ধুবুৰীৰ সাংসদ সাংসদ গৰাকীয়ে এক ভিডিঅ’ বাৰ্তাৰ জৰিয়তে কয়, ‘শুকুৰবাৰে দিনদুপৰতে গুৱাহাটীৰ নুনমাটিত ৫জন লোকে ২৪ বছৰীয়া ঋতুপৰ্ণ পেগুক নৃশংসভাৱে হত্যা কৰা ঘটনাত মই গভীৰ দোষ পাইছো।‘
এনে ঘটনা আগতে গুৱাহাটীত কোনোদিন শুনা নাই বুলি উল্লেখ কৰি তেওঁ কয় – আজমল ফাউণ্ডেচনে প্ৰয়াত পেগুৰ পৰিয়াললৈ ১ লাখ টকাৰ সাহায্য আগবঢ়াব।
ইয়াৰ উপৰি পৰিয়ালটিক ভৱিষ্যতে প্ৰয়োজন হ’লে সহায় কৰিবলৈ সাজু আছে বুুলিও তেওঁ কয়।
আজমলে লগতে কয়, ‘মই পেগুৰ প্ৰতি শ্ৰদ্ধা জনোৱাৰ লগতে শোকসন্তপ্ত পৰিয়ালবৰ্গলৈ সমবেদনা জনাইছো। আমি পেগুৰ পৰিয়ালৰ কাষত দৃঢ়তাৰে থিয় দিম।‘
তেওঁ উক্ত হত্যাকাণ্ডৰ ফাষ্ট ট্ৰেক আদালতত বিচাৰ প্ৰক্ৰিয়া চলাৰ লগতে দোষীক ফাঁচী দিয়াৰ দাবী জনায়।
উল্লেখযোগ্য যে যোৱা ১২ জুনত মহানগৰীৰ নুনমাটিত দূৰ্বৃত্তৰ চুৰিকাঘাতত ঋতুপৰ্ণ পেগুৱে প্ৰাণ হেৰুৱাইছিল।
উক্ত হত্যাকাণ্ডৰ লগত জড়িত থকাৰ অভিযোগত নুনমাটি আৰক্ষীয়ে হুছেইন আলি, দুলাল আলি, ইব্ৰাহিম আলি, মনোৱাৰা খাতুন আৰু আৰমান আলি নামৰ ৫জন ব্যক্তিক গ্ৰেপ্তাৰ কৰে।
