২০২১ৰ নিৰ্বাচনত শাসকীয় বিজেপি আৰু প্ৰধান বিৰোধী কংগ্ৰেছলৈ আহিব পাৰে এক বৃহৎ প্ৰত্যাহ্বান।
কিয়নো ৰাইজৰ দলৰ লগতে সকলো আঞ্চলিক দলৰ সৈতে মিত্ৰতা হ’বই বুলি চুড়ান্ত ঘোষণা কৰিছে অসম জাতীয় পৰিষদৰ সভাপতি লুৰীণজ্যোতি গগৈয়ে।
দেওবাৰে নুনমাটিত অসম জাতীয় পৰিষদৰ উদ্যোগত আয়োজিত শিল্পী দিৱসৰ এক কাৰ্যসূচীত অংশগ্ৰহণ কৰি সংবাদ মাধ্যমৰ আগত এই কথা ঘোষণা কৰে লুৰীণজ্যোতিয়ে।
তেওঁ কয় ‘ৰাইজৰ দলকে ধৰি সকলো আঞ্চলিক ৰাজনৈতিক দলৰ লগত মিত্ৰতা হ’বই। ইয়াৰ কাৰিকৰী কাম আমি আগবঢ়াম। ইতিমধ্যে আমি এই কথা উল্লেখ কৰিছো।‘
ইপিনে, ৰাষ্ট্ৰীয় ৰাজনৈতিক দলৰ সৈতে কোনোধৰণৰ মিত্ৰতা নহয় বুলি উল্লেখ কৰি লুৰীণে লগতে কয় ‘ৰাষ্ট্ৰীয় ৰাজনৈতিক দলকে ধৰি সাম্প্ৰদায়িক ৰাজনৈতিক দলৰ লগতো কোনোধৰণৰ মিত্ৰতা নহয়।‘
ইপিনে, ৰাইজৰ দলৰ লগতে অন্যান্য সমভাৱাসম্পন্ন আঞ্চলিক ৰাজনৈতিক দলৰ সৈতে অসম জাতীয় পৰিষদে নিৰ্বাচনত একেলগে অৱতীৰ্ণ হ’ব বুলি লুৰীণে ঘোষণা কৰে।
আনহাতে, আজি ৰাইজৰ দলৰ কাৰ্যকৰী সভাপতি ভাস্ক’ ডি শইকীয়াই মিত্ৰতাৰ সন্দৰ্ভত লুৰীণজ্যোতি গগৈলৈ এক পত্ৰ প্ৰেৰণ কৰাক লৈ সাংবাদিকে সোধাত লুৰীণে কয় ‘মিত্ৰতা হ’ব বুলি পূৰ্বৰে পৰা কৈ থকা হৈছে, ইয়াত পত্ৰ দিয়াৰ কোনো কথা আহি নপৰে। মিত্ৰতা হ’বই মাথো কথা-বতৰা পাতি একেলগে আগবাঢ়ি যাব লাগিব। ৰাইজৰ দলৰ ৰাজনৈতিক অভিৱৰ্তনতে মিত্ৰতা হ’ব বুলি ইতিমধ্যে চুড়ান্ত হৈছে। এতিয়া প্ৰস্তাৱ বা পত্ৰৰ প্ৰশ্নই নাহে।‘
উল্লেখ কৰিব পাৰি যে, অসম জাতীয় পৰিষদ আৰু ৰাইজৰ দলৰ মিত্ৰতা হ’লে নিশ্চয়কৈ বহু সমষ্টিত বিজেপি নাইবা কংগ্ৰেছৰ প্ৰাৰ্থী পৰাজিত হোৱাৰ সম্ভাৱনা প্ৰকট বুলি সচেতন মহলত চৰ্চিত হৈছে। ঠিক তেনেকৈ যদি নতুনত্বক বিশ্বাসত লৈ জাতীয়তাবাদী জনসাধাৰণ একত্ৰিত হয় তেন্তে জাতীয়তাবাদৰ চৰকাৰ হোৱাটো সু-নিশ্চিত বুলিও একাংশই দাবী তুলিছে।
