শুকুৰবাৰে এম্বুলেন্স চালকৰ ৰূপত দেখা গ’ল অসম জাতীয় পৰিষদৰ উপ সভাপতি দুলু আহমেদক। কিন্তু কিয় এইদৰে এম্বুলেন্স চলাইছে দুলু আহমেদে?
দৰাচলতে হাজোবাসীৰ বাবে এক সুখবৰ কঢ়িয়াই হাজোত আজিৰে পৰা আৰম্ভ হ’ল এখন বিনামূলীয়া এম্বুলেঞ্চ সেৱাৰ।
আজি পুৱাই এই বিনামূলীয়া এম্বুলেঞ্চ বাহনখন প্ৰথমে হাজোৰ পোৱামক্কা দৰগাহ শ্বৰীফত দোৱা কৰোৱাৰ পাছত শ্ৰী শ্ৰী হয়গ্ৰীৱ মাধৱ মন্দিৰত পূজা পাঠ কৰোৱা হয়।
তাৰ পাছতেই হয়গ্ৰীৱ মাধৱ মন্দিৰ প্ৰাংগণত পোৱামক্কা দৰগাহ শ্বৰীফৰ সাদিম আৰু সমাজসেৱক তথা এজেপি দলৰ নেতা দুলু আহমেদৰ উপস্থিতিত এই এম্বুলেঞ্চ সেৱাৰ শুভাৰম্ভণি কৰে মাধৱ মন্দিৰৰ দলৈ শিৱ প্ৰসাদ শৰ্মাই।
আশা কৰা হৈছে এই এম্বুলেন্স সেৱাই সমগ্ৰ হাজো সমষ্টিৰ ৰাইজকেই যথেষ্ট উপকৃত কৰিব।
