দেওবাৰে মন্ত্ৰী হিমন্ত বিশ্ব শৰ্মাই আছুৰ নেতৃবৃন্দ তথা অসম জাতীয় পৰিষদৰ বৰ্তমানৰ সভাপতি লুৰীণজ্যোতি গগৈয়ে কোভিডৰ সময়ত একো অৱদান আগনবঢ়োৱা তথা প্লাজমা দান নকৰা বুলি কৰা মন্তব্যৰ পাছতে তেওঁক উভটি ধৰি তুলা-ধুনা দিয়ে লুৰীণজ্যোতি গগৈয়ে।
চান্দমাৰীৰ তীৰ্থনাথ বৰুৱা ভৱনত অনুষ্ঠিত হোৱা এক যোগদান অনুষ্ঠানৰ অন্তত সংবাদ মাধ্যমৰ আগত হিমন্তৰ মন্তব্যৰ ওপৰত প্ৰতিক্ৰিয়া প্ৰকাশ কৰি লুৰীণে কয় ‘মন্ত্ৰীগৰাকীৰ এই বক্তব্যই প্ৰমাণ কৰে যে হিমন্ত বিশ্ব শৰ্মা কিমান হতাশজনক। তেওঁৰ এই মন্তব্য অতি হতাশাজনক। কিমান বেছি হতাশাত ভুগিলে নিজে পাহৰি যায় যে যাৰ ক’ৰ’না হৈছে তেওঁহে প্লাজমা দান কৰিব পাৰে।‘
ইপিনে, কোভিদ প্ৰট’কল মানি চলাটোৱেই দায়িত্বশীল নাগৰিকৰ কৰ্তব্য বুলি উল্লেখ কৰি লুৰীণে কয় ‘তেওঁ হয়তো পাহৰি গৈছে কোভিদ প্ৰট’কল যিদৰে মানি চলি ঘৰৰ ভিতৰত থাকিব লাগিছিল সেইমতেই আছিলো। তেওঁ ধনুকাৰ কথা মনত পেলাই থাকে, লুইচ বাৰ্জাৰ, সাৰদা ইত্যাদি চিন্তাই তেওঁৰ চিন্তাশক্তি ইমানেই কমাই দিলে যে তেওঁ সকলো পাহৰি পেলাইছে।তেওঁ সপোনতো ধনুকা, পিপিই কীট দেখি থাকে।‘
ইপিনে, হিমন্ত বিশ্ব শৰ্মাক সুস্থ ৰাজনীতি কৰিবলৈ আহ্বান জনাই লুৰীণে লগতে কয় ‘মানুহৰ মাজলৈ তেওঁলোকে কামৰ খাতিয়ান লৈ যাওঁক। এটা নিধি কৰিছিল সেই নিধিৰ হিচাপ মানুহৰ মাজত দিয়ক। ভাৰতীয় স্বাস্থ্য সংস্থাৰ অনুমোদন নোহোৱা বাবে পিপিই কীট চীনৰ পৰা আনি ব্যৱহাৰ নকৰাকৈ পেলাই থৈছে এই কথা সকলোৱে জানে।‘
আনহাতে, কেন্দ্ৰীয় গৃহ মন্ত্ৰী অমিত শ্বাহৰ পৰা আদি কৰি মুখ্যমন্ত্ৰী সৰ্বানন্দ সোণোৱাল, হিমন্ত বিশ্ব শৰ্মা আৰু ৰঞ্জিত দাসে পুনৰ এবাৰ বিজেপিৰ চৰকাৰ হ’ব বুলি কৰা দাবী সন্দৰ্ভতো লুৰীণে প্ৰতিক্ৰিয়া প্ৰকাশ কৰে।
তেওঁ কয় ’১৬ মে’ৰ পাছত কিমান বিদেশীয়ে টালি-টোপোলা বান্ধিলে এই কথাৰ হিচাপ দিয়ক। প্ৰদুষণমুক্ত কিমান হ’ল তাৰ উত্তৰ দিয়ক। তেওঁলোকৰ পদে পদে দুৰ্নীতি। কোনো এটা পৰীক্ষা দুৰ্নীতি নোহোৱাকৈ অনুষ্ঠিত কৰিব পৰা নাই।‘
‘বিজেপিয়ে প্ৰদূষণযুক্ত, দুৰ্নীতিযুক্ত, বিদেশীযুক্ত অসম গঢ়িলে। বিজেপিয়ে প্ৰতিশ্ৰুতি আৰু কিমান দিব? নতুন কিবা এটা ডাইলগ বনাই লৈ কৈ দিলেই নহ’ব কামটো কৰিবৰ বাবে সঁচা আন্তৰিকতা লাগিব।‘
ইপিনে, হিমন্ত বিশ্ব শৰ্মাই সাম্প্ৰদায়িক মন্তব্য বদৰুদ্দিন আজমলৰ সৈতে আলোচনা কৰিহে কৰে বুলি দাবী কৰি লুৰীণে লগতে কয় ‘দুয়োগৰাকীয়ে বুজা-বুজিৰ মাধ্যমৰে বেলেঞ্চ ৰাখি সাম্প্ৰদায়িক মন্তব্য কৰে বুলি সকলোৱে জানে। যিমান বদৰুদ্দিন আজমল শক্তিশালী হ’ব সিমানেই বিজেপি শক্তিশালী হ’ব।‘
