অসমত আন্তঃৰাজ্যিক পাৰপত্ৰ প্ৰৱৰ্তনৰ দাবীত অসম জাতীয়তাবাদী যুৱ ছাত্ৰ পৰিষদে আজি প্ৰতিকী চেক গেটেৰে প্ৰতিবাদ সাব্যস্ত কৰে। যুৱ ছাত্ৰ পৰিষদৰ তিনিচুকীয়া জিলা সমিতিৰ উদ্যোগত আৰু কাকপথাৰ আঞ্চলিক সমিতিৰ সহযোগত প্ৰতিবাদকাৰীসকলে অসম অৰুণাচল সীমান্তৱতী ডিৰাক গেটৰ সমীপতে প্ৰতিবাদী কাৰ্যসূচী ৰূপায়ণ কৰে।
প্ৰতিবাদকাৰীসকলে ৫২ নং ৰাষ্ট্ৰীয় ঘাইপথটোত অহা যোৱা কৰা যানবাহন সমূহত অসমত আন্তঃৰাজ্যিক পাৰপত্ৰৰ প্ৰৱৰ্তনৰ দাবীত বিভিন্ন প্ৰচাৰ পত্ৰ বিলাই প্ৰতিবাদ সাৱ্যস্ত কৰা দেখা যায়। যুৱ ছাত্ৰৰ প্ৰতিবাদকাৰীসকলে এই অভিনৱ প্ৰতিবাদেৰে অসমত অতি সোনকালে আন্তঃৰাজ্যিক পাৰপত্ৰৰ প্ৰৱৰ্তন কৰিবলৈ দাবী জনায়।
আনহাতে, জাতীয়তাবাদী যুৱ ছাত্ৰ পৰিষদৰ তিনিচুকীয়া জিলা সমিতিৰ উদ্যোগত আজিৰে পৰা আৰম্ভ হোৱা প্ৰতিবাদী কাৰ্যসূচী জিলাখনৰ অন্তৰ্গত সমূহ আঞ্চলিক সমিতিয়ে ৰূপায়ণ কৰিব বুলি অসম জাতীয়তাবাদী যুৱ-ছাত্ৰ পৰিষদৰ তিনিচুকীয়া জিলা সমিতিৰ সভাপতি সুৰজিৎ মৰাণে জানিবলৈ দিয়ে।
উল্লেখ্য যে অসম জাতীয়তাবাদী য়ুৱ ছাত্ৰ পৰিষদে জন্ম লগ্নৰে পৰা অসমত আন্তঃৰাজ্যিক পাৰপত্ৰৰ প্ৰৱৰ্তনৰ দাবী কৰি আহিছে। আনহাতে, বছৰ বছৰ ধৰি বিভিন্ন চৰকাৰ শাসনলৈ আহিছে যদিও কোনো এখন চৰকাৰে বিষয়টোৰ ক্ষেত্ৰত গুৰুত্ব প্ৰদান নকাৰৰ অভিযোগ উত্থাপিত হৈছে।
