নামনি ছিয়াং জিলাৰ নাৰিত থকা দয়িং ইৰিং ষ্টেডিয়ামত অনুষ্ঠিত টাকো দেবি স্মাৰক ফুটবল প্রতিযোগিতাত চিব’ বাগ আও কেবা দলে ছিয়াং দলক ৪-১ৰ ব্যৱধানত পৰাস্ত কৰি বিজয়ী হৈছে। এই খেলখন অজস্ৰ দৰ্শকৰ লগতে অৰুণাচলৰ পৰ্যটন, কৰ আৰু আৱকাৰী মন্ত্ৰী জাৰকাৰ গামলিন, লোকসভাৰ সাংসদ নিনং ইৰিং, নাৰি কয়ুৰ বিধায়ক কেণ্টো ৰিনা আৰু প্ৰাক্তন আয়ুক্ত(আইএএছ) টাপে বাগ্ৰা উপস্থিত আছিল।
চিব বাগ আও কেবা দলৰ হৈ বিকাশ গুৰুঙে হেটট্ৰিক দিয়ে। আনহাতে একোটি দলৰেই টনি ৰাগিয়ৰক সৰ্বশ্ৰেষ্ঠ খেলুৱৈ নিৰ্বাচিত কৰা হয়। আনহাতে গল্ডেন বুট আৰু গল্ডেন গ্ৰোভছ বঁটা লাভ কৰে পূব ছিয়াং-১ দলে। এই দলটোৱে সৰ্বশ্ৰেষ্ঠ নিয়মানুৱৰ্তী দল হিচাপে বঁটা লাভ কৰে।
বিজয়ীসকলক পৰ্যটন, কৰ আৰু আৱকাৰী মন্ত্ৰী জাৰকাৰ গামলিন, সাংসদ নিনং ইৰিং, পূব ছিয়াং জিলা অলিম্পিক এছোচিয়েশ্যনৰ সভাপতি টামাট গামোহ আৰু প্ৰয়াত টাকো দাবিৰ পত্নীয়ে ট্ৰফি, প্ৰমাণপত্ৰ আৰু নগদ ধনেৰে সন্মান জনায়।
অৰুণাচলৰ বিধানসভাৰ প্ৰয়াত অধ্যক্ষ তথা মন্ত্ৰী টাকো দেবিৰ সোঁৱৰণত অনুষ্ঠিত হোৱা এই ফুটবল খেলখন ২০১৯ৰ জানুৱাৰিৰ ৭ তাৰিখে অৰুণাচলৰ উপ মুখ্য মন্ত্ৰী চাওনা মেইনে উদ্বোধন কৰিছিল। এই প্ৰতিযোগিতাত অধুনালুপ্ত ছিয়াং জিলাৰ পৰা গঠন কৰা দলসমূহে অংশগ্ৰহণ কৰিছিল। এই খেলখনৰ আয়োজন কৰিছিল নামনি ছিয়াঙৰ জিলা ফুটবল সংস্থাই আৰু পৃষ্ঠফোষকতা কৰিছিল চিব’ বাগ আও কেবা ছচাইটীয়ে।
