কাৰাগাৰৰ ভিতৰতে গুৰুতৰভাৱে অসুস্থ হৈ পৰা কৃষক মুক্তি সংগ্ৰাম সমিতিৰ নেতা অখিল গগৈক আজি স্বাস্থ্য পৰীক্ষাৰ বাবে গুৱাহাটী চিকিৎসা মহাবিদ্যালয়লৈ লৈ অহা হয়।
কাৰাগাৰ কৰ্তৃপক্ষই ৰাতিপুৱা ৯.৩০ বজাত জিএমচিএইচলৈ আনে কৃষক মুক্তি সংগ্ৰাম সমিতিৰ নেতা গৰাকীক।
সেয়েহে তেওঁক বৰ্তমান অনা হৈছে জি এম চি এইছলৈ। বৰ্তমান অখিলৰ চিকিৎসা কৰি আছে চিকিৎসকে।
কাৰাগাৰৰ ভিতৰতে অখিল গগৈক জিএমচিএইচৰ চিকিৎসকৰ দলে চিকিৎসা চলাই আছিল যদিও নিয়াৰ আদালতে প্ৰয়োজন সাপেক্ষে অখিলক উন্নত চিকিৎসা প্ৰদান কৰিবলৈ কালি নিৰ্দেশ দিছিল।
জানিব পৰা মতে অখিল প্ৰচণ্ড পেটৰ বিষ, জ্বৰ, প্ৰস্বাৱৰ সমস্যা আৰু পিঠিৰ বিষত আক্ৰান্ত হৈ আছে।
অখিলৰ পত্নী গিতাশ্ৰী তামুলীয়ে তেওঁৰ উন্নত চিকিৎসাৰ বাবে চিকিৎসালয়ত চিকিৎসা কৰিবলৈ আহ্বান জনাই ৩ মাৰ্চত NIA আদালতত আবেদন জনাইছিল।
বিগত ৪ মাৰ্চৰ পৰা জি এম চি এইচৰ গৱেষক চিকিৎসকৰ এটা দল উপস্থিত হৈ কাৰাগাৰৰ ভিতৰতে চিকিৎসা কৰিছিল অখিলৰ।
উল্লেখযোগ্য যে, যোৱা ২৯ ফেব্ৰুৱাৰীৰ পৰা কাৰাগাৰৰ ভিতৰতে শয্যাগত হৈ আছিল অখিল।
বৰ্তমান পেটৰ বিষৰ পৰা কিছু পৰিমানে উপশম পোৱা অখিল গগৈক গুৱাহাটী চিকিৎসা মহাবিদ্যালয়ত চিটি স্কেন কৰা হয়।
জিএমচিএইচত পৰীক্ষাৰ অন্তত অখিলৰ খাদ্য নলীৰ কেইবা ঠাইতো ঘাঁ, কিডনিত পাথৰৰ উপস্থিতি, গেষ্ট্ৰিক আলছাৰ ধৰা পৰিছে বুলি জানিব পৰা গৈছে।
আনহাতে, গুৱাহাটী চিকিৎসা মহাবিদ্যালয়ত স্বাস্থ্য পৰীক্ষাৰ অন্তত পুনৰ কাৰাগাৰলৈ লৈ যোৱা হয় অখিল গগৈক।
অসুস্থ কৃষক নেতা গৰাকীক সাক্ষাৎ কৰাৰ বাবে চিকিৎসালয়ত কণ্ঠশিল্পী মানস ৰবীন, স্বৰাজ অসমৰ আহ্বায়ক ভৱেন সন্দিকৈ, কৃষক মুক্তি সংগ্ৰাম সমিতিৰ সভাপতি ভাস্ক’ডি শইকীয়াকে ধৰি অন্য সতীৰ্থ সকল উপস্থিত হয়।
অখিল গগৈৰ কিডনিত পাথৰ ধৰা পৰিছে বুলি মানস ৰবীনে আমাক কয়।
গুৱাহাটী চিকিৎসা মহাবিদ্যালয়ৰ কেণ্টিনতে ৰাতিপুৱাৰ আহাৰ গ্ৰহণ কৰে অখিল গগৈয়ে।