দেশজুৰি চাঞ্চল্যৰ সৃষ্টি কৰা তেলেংগানাৰ ৰাজধানী হাইদৰাবাদৰ চিকিৎসক যুৱতীক প্রথমে ধৰ্ষণ আৰু তাৰ পাছত গাত জুই লগাই হত্যা কৰা ঘটনাৰ সৈতে জড়িত চাৰি অভিযুক্তক আৰক্ষীয়ে গুলীয়াই হত্যা কৰে।
আজি পুৱতি নিশা প্ৰায় ৩.৩০ মান বজাত এই ঘটনাটো সংঘটিত হয়।
জানিব পৰা মতে, অভিযুক্ত বলাৎকাৰী কেইজনক তদন্তৰ বাবে ঘটনাস্থলিলৈ লৈ যোৱা হৈছিল। কিন্তু সেই সময়তে আটাইকেইজন অভিযুক্তই পলাবলৈ চেষ্টা কৰাত আৰক্ষীয়ে এনকাউণ্টাৰ কৰে।
৪৪ নং ৰাষ্ট্ৰীয় ঘাইপথত সংঘটিত এই এনকাউণ্টাৰত ক্ৰমে মহম্মদ আৰিফ, নবীন, চিন্তাকুন্তা আৰু শিবা নামৰ বলাৎকাৰী কেইজনৰ মৃত্যু হোৱা বুলি নিশ্চিত কৰে চাইবৰাবাদ আৰক্ষীয়ে।
উল্লেখ্য যে যোৱা ২৭ নৱেম্বৰৰ নিশা হাইদৰাবাদ চহৰৰ সমীপত ২৬ বছৰীয়া পশু-চিকিৎসক প্ৰিয়ংকা ৰেড্ডীক উক্ত দুৰ্বৃত্ত কেইজনে প্ৰথমে ধৰ্ষণ আৰু তাৰ পাছত গাত জুই লগাই অতি নিৰ্মমভাৱে হত্যা কৰিছিল।
পিছত চিকিৎসকগৰাকীৰ জ্বলি যোৱা মৃতদেহ ২৮ নৱেম্বৰ অৰ্থাৎ বৃহস্পতিবাৰে পুৱা এটা কালভাৰ্টৰ তলত উদ্ধাৰ হয়।
