দিল্লীৰ নিজামুদ্দিন মাৰ্কাজৰ জামাতত অংশগ্ৰহণ কৰিবলৈ যোৱা লখিমপুৰ জিলাৰ আটাইকেইজন লোকৰে COVID-19 নিগেটিভ ধৰা পৰিছে। জিলাখনৰ পৰা ৬গৰাকী ব্যক্তিয়ে জামাতত অংশগ্ৰহণ কৰিবলৈ গৈছিল।
লখিমপুৰ জিলা স্বাস্থ্য বিভাগে আজি এই কথা ঘোষণা কৰে।
মঙলবাৰে উক্ত লোককেইজনক উত্তৰ লখিমপুৰ অসামৰিক চিকিৎসালয়ত আইছ’লেশ্যনত ৰখাৰ পিছত তেওঁলোকৰ তেজৰ নমুনা ডিব্ৰুগড়ৰ লাহোৱালস্থিত ICMR পৰীক্ষাগাৰলৈ প্ৰেৰণ কৰা হয়।
উল্লেখযোগ্য যে উক্ত ৬গৰাকী ব্যক্তিৰ পৰিয়ালৰ সদস্যসকলকো বৰ্তমান ১৪ দিনৰ বাবে হ’ম কুৱাৰেণ্টাইনত ৰখা হৈছে। আনহাতে নিজামুদ্দিনৰ জামাতত অংশ লোৱা লখিমপুৰৰ এজন ব্যক্তি বৰ্তমান কলকতাত আছে বুলি জানিব পৰা গৈছে।
এই পৰ্যন্ত লখিমপুৰ জিলাৰ মূঠ ৩২৫৩ গৰাকী ব্যক্তিক হ’ম কুৱাৰেণ্টাইনত ৰখা হৈছে।
আজি জিলাখনৰ উপায়ুক্ত জীৱন বি আৰু আৰক্ষী অধীক্ষক ৰাজবীৰ সিঙে দৰিদ্ৰ লোকসকলৰ মাজত খাদ্য সামগ্ৰী বিতৰণ কৰে।
ইপিনে জিলাখনৰ আৰক্ষীয়ে COVID-19 সম্পৰ্কে সামাজিক মাধ্যমত সাম্প্ৰদায়ীক প’ষ্ট দিয়া কেইবা গৰাকী লোকক আটক কৰিছে।
