দুৰ্নীতি ৰোধৰ বাবে ৰাজ্য চৰকাৰে চৰকাৰী বিভাগ সমূহৰ ক্ষেত্ৰত যিমানেই কঠোৰ পদক্ষেপ গ্ৰহণ নকৰক কিয়, চৰকাৰৰ চকুত ধুলি মাৰি কেতবোৰ বিভাগত এতিয়াও সংঘটিত হৈ আছে দুৰ্নীতি। শেহতীয়াকৈ তেনে এক দুৰ্নীতিৰ ঘটনা পোহৰলৈ গোলাঘাটত।
উন্মোচিত হৈছে চৰকাৰী বিভাগৰ পয়াঁলগা ছবি। অৰ্থাৎ গোলাঘাটৰ পশু চিকিৎসালত সংঘটিত হোৱা এই ঘটনাই এতিয়া পোহৰলৈ আনিছে ৰাজ্যৰ এই বিয়াগোম বিভাগটোৰ প্ৰকৃত স্বৰূপ। ঘটনা অনুসৰি চৰকাৰী কাৰ্যালয়তে খোদ চিকিৎসকজনে পশুধনৰ ফাৰ্মাচী খুলি ব্যৱসায়ীৰ ৰূপত অৱতীৰ্ণ হৈছে।
চিকিৎসালয়ত থকা ঔষধ বিক্ৰী কৰাৰ অভিযোগ আনিছে ভুক্তভোগী ৰাইজে।
অভিযোগ অনুসৰি চিকিৎসকসহ সহযোগী ফিল্ড এচিটেন্টে চিকিৎসালয়লৈ অহা ঔষধ প্ৰকৃত দৰতকৈ অধিক দৰত বিক্ৰী কৰে। এই ঘটনাক কেন্দ্ৰ কৰি চিকিৎসালয়খনত এক উত্তপ্ত পৰিস্থিতিৰ সৃষ্টি হয়।
এতিয়া চৰ্চা হৈছে যে গোলাঘাটৰ ৰাজ্যিক পশু চিকিৎসালয় সংঘটিত এই ঘটনা মাথো এটা উদাহৰণহে।
ৰাজ্যৰ সকলোবোৰ পশু চিকিৎসালয় চলিছে অনুৰূপ ধৰণে।বিভাগ চলাবলৈ নাই কোনো চৰকাৰী পুঁজিৰ আৱণ্টন।
দৰমহাৰ টকাৰে কৰিবলগীয়া হয় কাৰ্যালয়ৰ বিভিন্ন কামকাজ।
গ্ৰাম্য অৰ্থনীতিৰ বাবে অতি গুৰুত্বপূৰ্ণ বিভাগটো যদি এনেদৰে জোৰাটাপলি মাৰি চলিবলগীয়া হয়,তেন্তে চৰকাৰী পক্ষৰ মুখত সততে উচ্চাৰিত কৃষক দৰদী শব্দ, বাক্যসমূহ অৰ্থহীন বুলিয়েই বিবেচিত হ’ব।
