অসমত প্ৰস্তাৱিত ফিল্মফেয়াৰ বঁটাৰ অনুষ্ঠানক লৈ ক্ষুব্ধ অমিত শ্বাহ
কেন্দ্ৰীয় গৃহ মন্ত্ৰী তথা বিজেপিৰ ৰাষ্ট্ৰীয় সভাপতি অমিত শ্বাহ ৰাজ্যখনত অসম চৰকাৰে বার্ষিক ফিল্মফেয়াৰ বঁটা অনুষ্ঠান পতাৰ বাবে লোৱা সিদ্ধান্তত ক্ষুব্ধ হৈ পৰিছে।
অমিত শ্বাহে অলপতে ৰাজ্যিক বিজেপিৰ এগৰাকী শীৰ্ষ নেতাৰ সৈতে হোৱা টেলিফোনিক বাৰ্তালাপত ৰাজ্যখনত নাগৰিকত্ব সংশোধনী বিধেয়ক আৰু ৰাষ্ট্ৰীয় নাগৰিক পঞ্জীক লৈ চলি থকা প্ৰতিবাদৰ সময়তে অসমত ফিল্মফেয়াৰ বঁটা অনুষ্ঠান পতাৰ সিদ্ধান্তত ক্ষোভ ব্যক্ত কৰে।
ৰাজ্যিক বিজেপিৰ শীৰ্ষ নেতাগৰাকীক শ্বাহে কয় যে বিশেষকৈ এনেকুৱা এটা সংকটৰ মুহূৰ্তত কোটি কোটি টকা খৰচ কৰি ফিল্মফেয়াৰ বঁটা অনুষ্ঠান পাতিলে অসমত শাসকীয় দলটোৰ ভাবমূৰ্তিত প্ৰভাৱ পৰিব।
আনহাতে, অসম চৰকাৰে ৬৫ সংখ্যক ফিল্মফেয়াৰ বঁটা অনুষ্ঠান পতাৰ বাবে তৎপৰ হৈ পৰিছে।
অসমৰ বিজেপি নেতৃত্বাধীন চৰকাৰখনে ইতিমধ্যে ফিল্মফেয়াৰ বঁটাৰ অনুষ্ঠানে ৰাজ্যখনত বহু পৰিমানে পৰ্যটনৰ সম্ভাৱনা বৃদ্ধি কৰিব বুলি প্ৰচাৰ চলাইছে।
অসম পৰ্যটন উন্নয়ন নিগম (এ টি ডি চি) আৰু টাইমছ অফ ইণ্ডিয়া গ্ৰুপৰ মাজত অলপতে মহানগৰীৰ এখন হোটেলত মুখ্য মন্ত্ৰী সৰ্বানন্দ সোণোৱাল, বেনেট এণ্ড ক’লেমেন কোম্পানী লিমিটেডৰ পৰিচালন সঞ্চালক বিনীত জৈন আৰু পৰ্যটন বিভাগৰ মন্ত্ৰী চন্দন ব্ৰহ্মৰ উপস্থিতিত ২০২০ চনৰ ১৫ ফেব্ৰুৱাৰিৰ পৰা গুৱাহাটীত ৬৫ সংখ্যক ফিল্মফেয়াৰ বঁটা অনুষ্ঠানৰ আয়োজন কৰাৰ বাবে এখন বুজাবুজি চুক্তি স্বাক্ষৰিত হয়।
মুখ্য মন্ত্ৰীয়ে কৈছিল,’’বিশ্বৰ ২০০ কোটি লোকে ফিল্মফেয়াৰ বঁটা অনুষ্ঠানৰ জৰিয়তে ৰাজ্যখনৰ সাংস্কৃতিক ঐতিহ্য তথা পৰ্যটন সম্ভাৱনাৰ বিষয়ে জানিব পাৰিব।‘’
তেওঁ লগতে উক্ত অনুষ্ঠানতে কৈছিল যে অসমৰ ৰাইজে বিশ্বৰ দৰবাৰত অসমক শক্তিশালীভাৱে তুলি ধৰা এই সুযোগ নিশ্চয় ল’ব।