ইৰাণ আৰু ইজৰাইলৰ মাজত কিয় এই উত্তেজনা? তাৰ কাৰণে আমি দুবছৰ আগলৈ উভতি যাব লাগিব। ইজৰাইলে পেলেষ্টাইনী সকলক সকলো ফালৰপৰা ঘেৰি ধৰি নিজৰ জন্মভূমিতে তেওঁলোকক গৃহহাৰা কৰি পেলাইছে। পেলেষ্টাইনৰ ওপৰত ইজৰাইলৰ মাতব্বৰিতাত অতিষ্ঠ হৈ ২০২৩ চনৰ ৭ অক্টোৱৰৰ দিনা হামাচে অতৰ্কিতে ইজৰাইলৰ ওপৰত আক্ৰমণ কৰিছিল। এই আক্ৰমণত ইজৰাইলৰ বিস্তৰ ক্ষতি হৈছিল। বহু ইজৰাইলী নাগৰিকক হামাচে পণবন্দী কৰি লৈ গৈছিল। তাৰপিছৰে পৰা ইজৰাইলে পেলেষ্টাইনৰ ওপৰত উপৰ্যুপৰি আক্ৰমণ চলাইছিল। তেওঁলোকে গাজাক ধ্বংসস্তুপলৈ ৰূপান্তৰিত কৰিছিল। গাজালৈ আন্তৰ্জাতিক সাহায্য পঠোৱা হাজাৰ হাজাৰ ট্ৰাক মাহৰ পিছত মাহ ৰাস্তাতে ৰখাই থোৱা আছিল। হামাচক লেবাননৰ উগ্ৰপন্থী সংগঠন হিজবুল্লাই সমৰ্থন জনোৱা বাবে ইজৰাইলে লেবাননৰ হিজবুল্লাৰ ঘাটিতো আক্ৰমণ চলাইছিল।যোৱা বছৰৰৰ চেপ্তেম্বৰ /অক্টোৱৰত ইজৰাইলে লেবাননত হিজবুল্লাৰ ঘাটিত লেজাৰ আক্ৰমণৰ দ্বাৰা বিস্তৰ ক্ষতি সাধন কৰিছিল। হিজবুল্লাই হামাচক সমৰ্থন কৰে। আকৌ ইচলামিক সংগঠন বুলি হিজবুল্লাক ইৰাণে সমৰ্থন কৰে। ইৰাণে হিজবুল্লাক সমৰ্থন কৰে বুলিয়ে ইজৰাইলৰ ইৰাণৰ ওপৰত খং। সেইকাৰণেই যোৱা বছৰৰ এপ্ৰিল মাহত ইজৰাইলে চিৰিয়াত থকা ইৰাণী দূতাবাসত আক্ৰমণ কৰি কেইবাজনো ইৰাণী নেতাক হত্যা কৰিছিল। ইৰাণেও ইজৰাইলৰ ওপৰত আক্ৰমণ কৰি তাৰ পোতক লৈছিল। তেতিয়াৰে পৰা ইৰাণ আৰু ইজৰাইলৰ মাজৰ সম্পৰ্কৰ অৱনতি ঘটিছিল। কিন্তু মধ্য প্ৰাচ্যৰ সামৰিক উত্তেজনা কেনেকৈ হ্ৰাস কৰা যায় সেই সম্পৰ্কে ইৰাণৰ লগত আমেৰিকাৰ আলোচনা চলি থকাৰ মাজতে যোৱা ১৩ জুনৰ দিনা পুৱা ইজৰাইলে ইৰাণৰ আনবিক শক্তি কেন্দ্ৰত আক্ৰমণ কৰে। ইজৰাইলৰ আক্ৰমণত ইৰাণৰ যথেষ্ট ক্ষতিসাধন হয়। ইজৰাইলৰ আক্ৰমণত প্ৰথমে ইৰাণ উৱাদিহ নোপোৱা হৈ পৰিছিল যদিও খুব কম সময়ৰ ভিতৰতে তেওঁলোকে পৰিস্থিতি চম্ভালি লয় আৰু সন্ধিয়া প্ৰায় ২০০ বেলিষ্টিক ক্ষেপণাস্ত্ৰৰে ইজৰাইলৰ বচা বচা ঠাইত আক্ৰমণ কৰে। ইৰাণ আৰু ইজৰাইলৰ মাজৰ সামৰিক পৰিস্থিতি এতিয়া অত্যন্ত উত্তেজনাপূৰ্ণ। কিন্তু পৰিস্থিতি এতিয়া একপক্ষীয় হৈ থকা নাই। ইজৰাইলে ইৰাণৰ ক্ষতি কৰিছে ঠিকেই, কিন্তু ইৰাণেও ইজৰাইলৰ বিস্তৰ ক্ষতি সাধন কৰিছে। আগতে আমি গাজাক ধ্বংসস্তুপত পৰিণত কৰা যিবোৰ ছবি দেখিছিলোঁ এতিয়া ইজৰাইলৰ আমি তেনে ছৱি দেখিবলৈ পাইছোঁ।
ইজৰাইলৰ এই সংকটত প্ৰধানমন্ত্ৰী নিটানিয়াহুৱে বাৰে বাৰে আমেৰিকাক ইজৰাইলক সহায় কৰিবলৈ কাকুতি-মিনতি কৰিব লগা হৈছে।কিন্তু এতিয়ালৈকে আমেৰিকাই একো কোৱা নাই। ৰাচিয়া আৰু চীনেও ৰাজহুৱাকৈ একো কোৱা নাই যদিও ইৰাণলৈ তেওঁলোকে সমৰ সাহায্য আগবঢ়াইছে।এইখিনিতে আমি এটা কথা মন কৰা উচিত হ’ব। আমি লক্ষ্য কৰিছোঁ যে লাহে লাহে বিশ্বৰ আগৰ এককেন্দ্ৰিক অৱস্থাটো, ইংৰাজীত যাক unipolar বুলি কোৱা হয় যেন সলনি হ’বলৈ ধৰিছে। আগৰ চোভিয়েট ৰাচিয়া ভগি যোৱাৰ পিছত, আজি কেইবা দশকো ধৰি বিশ্বত অৰ্থনৈতিক আৰু সামৰিক ক্ষেত্ৰত আমেৰিকাই একক সম্ৰাট হৈ পৰিছিল। কিন্তু চীনৰ অগ্ৰগতিয়ে আমেৰিকাৰ একাধিপত্যৰ বাবে এক প্ৰত্যাহ্বানৰ সৃষ্টি কৰিছে। হয়, এতিয়া ইউৰোপ আৰু আমেৰিকা ইজৰাইলৰ লগত আছে। কিন্তু চীন আৰু ৰাচিয়াই ইৰাণক সহায় কৰিছে। গতিকে আমেৰিকাৰ আগৰ দাদাগিৰি কমি আহিছে। ইউৰোপ আৰু আমেৰিকাই গণতন্ত্ৰৰ কথা কৈ ইজৰাইলক সমৰ্থন কৰি আহিছে। কিন্তু ট্ৰাম্প আৰু এলন মাস্কে আমেৰিকাত কি গণতন্ত্ৰৰ পৰাকাষ্ঠা কৰিছে সেইটোও আমি দেখিছোঁ। আৰু পেলেষ্টাইনত ১৯৪৮ চনৰ পৰা এতিয়ালৈকে ইজৰাইলে কি বিভীষিকাৰ সৃষ্টি কৰি আহিছে তাকো আমি দেখিছোঁ। আচলতে হৈছে কি? এফালে ইচলামিক মৌলবাদ আৰু আনফালে ইজৰাইল আৰু পাশ্চাত্যৰ আধিপত্য, দৌৰাত্ম্য। বহু সময়ত ইচলামিক মৌলবাদ আৰু মধ্যপ্ৰাচ্যৰ সাধাৰণ মানুহৰ মাজৰ ব্যৱধানো নোহোৱা হৈ যায়।গতিকে ইচলামিক মৌলবাদ বুলি কৈ পোনচাটেই আমি ইৰাণ, হিজবুল্লা আৰু হামাচক গৰিহণা দিব নোৱাৰোঁ। কথাবোৰ আমি তাৰ জটিলতা আৰু সুক্ষ্মতাত বিচাৰ কৰিব লাগিব।ইচলামিক মৌলবাদৰ দোহাই দি মধ্যপ্ৰাচ্যত আমি আমেৰিকা আৰু ইজৰাইল কেন্দ্ৰিক আধিপত্যক সমৰ্থন কৰিব নোৱাৰোঁ। ইজৰাইলৰ আজি যি অৱস্থা সেই অৱস্থা আজি কিমান দিন আমি গাজাত দেখি আহিছোঁ। তেতিয়া কিন্তু আমাৰ কাৰো কোনো দৰদ উঠলি উঠা নাছিল। আজি ইজৰাইলৰ অৱস্থা দেখি পশ্চিম আৰু ইউৰোপ যেনেকৈ উদ্বিগ্ন হৈ পৰিছে গাজাৰ তাতকৈ হাজাৰ গুণ বেয়া অৱস্থা দেখি তেওঁলোকৰ বিবেক কিন্তু জাগ্ৰত হোৱা নাছিল! কিয় এই দুমুখীয়া চৰিত্ৰ আৰু ভণ্ডামি? আৰু এটা কথা। ভাৰতে ইমান দিন সদায় পেলেষ্টাইনৰ পক্ষত আছিল। গোষ্ঠী নিৰপেক্ষ আন্দোলনৰ বাবে ভাৰতৰ জগতত এটা নাম আছিল। কিন্তু আজি আমি কিয় ইজৰাইলৰ মুখাপেক্ষী হৈ পৰিলোঁ? ইজৰাইল- ইৰাণ সংঘাতক আমি সহজভাৱে লোৱা অনুচিত। ই সমগ্ৰ বিশ্বকে তৃতীয় বিশ্ব যুদ্ধ আৰু আণবিক সমৰলৈ লৈ যাব পাৰে। সেই কাৰণে এই মুহূৰ্তত আটাইতকৈ গুৰুত্বপূৰ্ণ কথা হৈছে ইজৰাইলক মানে নিটানিয়াহুক নিয়ন্ত্ৰণ কৰাটো।নিটানিয়াহুক নিয়ন্ত্ৰণলৈ আনিলে আপোনাআপুনি মধ্য প্ৰাচ্য শান্ত হৈ পৰিব।
