সাত অক্টোবৰৰ দিনা হামাচ উগ্ৰপন্থীয়ে অতৰ্কিতে ইজৰাইলৰ ওপৰত চলোৱা আক্ৰমণত প্ৰায় ১৪০০ অসামৰিক আৰু সামৰিক লোকৰ মৃত্যু হৈছিল। উগ্ৰপন্থী সকলে শিশু, বৃদ্ধকে ধৰি প্ৰায় ২০০ইজৰাইলী লোকক অপহৰণ কৰি নিছিল। এক কল্পকাহিনীৰ দৰে অবিশ্বাস্য আছিল হামাচৰ সেই আক্ৰমণ। হামাচৰ আক্ৰমণক সকলোৱে একমুখে গৰিহণা দিছিল।কিন্তু, তাৰ পিছৰ পৰা, মধ্য প্ৰাচ্যৰ পৰিস্থিতি অতি উত্তেজনাপূৰ্ণ হৈ পৰে। ইজৰাইল জকি উঠে আৰু হামাচক নিঃশেষ কৰিবলৈ ইজৰাইলে গাজাৰ ওপৰত আকাশমাৰ্গেৰে ধাৰাসাৰ বোমা নিক্ষেপ কৰিবলৈ আৰম্ভ কৰে। বোমা বৰ্ষণৰ ফলত কিমান হামাচ উগ্ৰপন্থীৰ মৃত্যু হৈছে সেইটো আমি নাজানো। কিন্তু, গাজাৰ স্বাস্থ্য মন্ত্ৰালয়ে দিয়া তথ্য মতে এতিয়ালৈকে প্ৰায় ৩০০০ পেলেষ্টানিয়ান লোকৰ মৃত্যু হৈছে আৰু প্ৰায় ১২০০ লোক মৃত বা জীৱিত অৱস্থাত মাটিৰ তলত পোটখাই আছে। স্থল আক্ৰমণেৰে হামাচক শ’লঠেকত পেলাবলৈ ইজৰাইলে গাজাত থকা দহ লাখ সাধাৰণ নাগৰিকক ২৪ ঘন্টাৰ ভিতৰত উত্তৰ গাজা এৰি দক্ষিণ গাজালৈ যাবলৈ বাৰে বাৰে সতৰ্ক কৰি দি আছে।আনহাতে হামাচে কৈ আছে ইজৰাইলৰ এইবোৰ মিছা প্ৰচাৰ, নিজৰ ঘৰ-বাৰী এৰি কোনেও ক’লৈকো যোৱাৰ প্ৰয়োজন নাই। ইজৰাইল আৰু হামাচৰ ৰণত সাধাৰণ পেলেষ্টাইনী ৰাইজৰ একোনাই অৱস্থা। তাৰ মাজতে জীয়াই থকাৰ আশাত হাজাৰ হাজাৰ পেলেষ্টাইনী লোকে নিজৰ লামলাকটু য’ত যি পায় তাকে লৈ দক্ষিণ গাজালৈ ঢাপলি মেলিছে। কোনোবাই বা চিকিৎসালয়ত আশ্ৰয় লৈছেগৈ। খোৱা পানী নাই, বিদ্যুৎ যোগান ব্যাহত। খাদ্যৰ অভাৱ।ৰুটিৰ দোকানত দীঘল দীঘল শাৰী। গাইপতি প্ৰতিজন মানুহৰ বাবে মাত্ৰ এক লিটাৰ পানী।চিকিৎসালয় চলি আছে জেনেৰেটৰৰ ওপৰত।তাকো কোন মুহূৰ্তত জেনেৰেটৰ বন্ধ হৈ চিকিৎসালয়ত অচলাৱস্থাৰ সৃষ্টি হয় ঠিক নাই।চিকিৎসালয়ত থকা শিশু, গৰ্ভৱতী মহিলা, বৃদ্ধ ৰোগী সকলৰ অৱস্থা সংকটাপন্ন। চাৰিওফালে এক নৰক সদৃশ বিভীষিকাময় পৰিস্থিতি। তেনেতে কি হ’ল? ৰোগীৰ লগতে অজস্ৰ সাধাৰণ মানুহ আশ্ৰয় লৈ থকা গাজাৰ অল-আহলি আৰৱ চিকিৎসালয়ত ১৭ অক্টোৱৰৰ সন্ধিয়া এক বোমা ফুটিল।চিকিৎসালয়ত, আৰোগ্য কেন্দ্ৰত বোমা বিস্ফোৰণ! লগে লগে চাৰিওফালে হুৱাদুৱা লাগিল। হঠাৎ, প্ৰায় ৫০০ শিশু, মহিলা, বৃদ্ধ আৰু অন্যান্য লোকৰ মৃত্যু হ’ল। আৰৱ ৰাষ্ট্ৰ সমূহে বোমা বিস্ফোৰণৰ বাবে ইজৰাইলক জগৰীয়া কৰিলে। কিন্তু, ইজৰাইলে ক’লে যে হামাচৰ লক্ষ্যভ্ৰষ্ট ৰকেটেহে হেনো চিকিৎসালয়খন ধংস কৰিলে। তাৰ প্ৰমাণ হিচাপে তেওঁলোকে অল জাজিৰা সংবাদ সংস্থাৰ লাইভ স্ত্ৰিম ভিডিঅ’ এটাক প্ৰমাণ হিচাপে দাঙি ধৰিলে। কিন্তু, অল জাজিৰাৰ ডিজিটেল অনুসন্ধানে ১৭ অক্টোৱৰৰ সন্ধিয়া ৬:৪৫, ৬:৫৫,৬:৫৭ আৰু ৬:৫৮ৰ ইজৰাইলী যুঁজাৰু বিমান আৰু হামাচৰ ৰকেট নিক্ষেপৰ মাজত হোৱা সংঘৰ্ষৰ তন্ন তন্ন খতিয়ান দি ক’লে যে ৬:৫৮ মিনিটত হামাচৰ শেষ ৰকেটটো ইজৰাইলে জব্দ কৰিছিল আৰু তাৰ আগেয়ে আৰু তাৰ ঠিক পিছতে গাজাত ইজৰাইলৰ যুঁজাৰু বিমানে উপৰ্যুপৰি বোমা বৰ্ষণ কৰিছিল। সেই বোমা বৰ্ষণেই অল-আহলি আৰৱ চিকিৎসালয় বিধ্বস্ত কৰি হত্যালীলাৰ সৃষ্টি কৰিছিল।এইখিনিতে, কালি কৰণ থাপাৰৰ সৈতে হোৱা ১৪ মিনিটৰ সাক্ষাৎকাৰ এটাত Palestinian National Initiativeৰ সভাপতি মুস্তাফা বাৰঘৌটিয়ে (Mustafa Barghouti) কোৱা কথাকেইটা তাৎপৰ্যপূৰ্ণ।তেওঁৰ মতে চিকিৎসালয়খনত ইজৰাইলে আক্ৰমণ কৰা নাই বুলি কোৱা কথাটো “a lie” and US President Joe Biden agreeing with the Israeli claim is “unacceptable”।এইটো এটা মস্ত ফাঁকি আৰু আমেৰিকাৰ ৰাষ্ট্ৰপতি জো বাইদেনে তেওঁলোকৰ সুৰতে সুৰ মিলোৱাটো আমাৰ কাৰণে মুঠেই গ্ৰহণযোগ্য নহয়।তেওঁ লগতে কৈছে যে চিকিৎসালয়খনত আক্ৰমণ কৰা ইজৰাইলৰ ভাষ্যটো তেওঁলোকে তিনিবাৰ সলাইছে। প্ৰথমে ইজৰাইলে কৈছিল যে হামাচ উগ্ৰপন্থী আশ্ৰয় লৈ থকা বাবে ইজৰাইলী সেনাই চিকিৎসালয়খনত আক্ৰমণ কৰিছিল, তাৰ পিছত তেওঁলোকে কয় যে হামাচেহে চিকিৎসালয়খনত আক্ৰমণ কৰিছিল আৰু শেষত তেওঁলোকে সেই আক্ৰমণৰ বাবে দায়ী কৰিছিল ইচলামিক জেহাদীক।
মধ্য প্ৰাচ্যত কি এক পৰিস্থিতিৰ সৃষ্টি হৈছে? প্ৰথমে ইজৰাইলৰ ওপৰত হামাচৰ অপ্ৰত্যাশিত আক্ৰমণ। সেই আক্ৰমণৰ পোতক তুলিবলৈ ইজৰাইলে এতিয়া সমগ্ৰ গাজাবাসীকে পণবন্দী কৰিছে। হামাচ এটা উগ্ৰপন্থী সংগঠন। কিন্তু, ইজৰাইল এখন বিধিবদ্ধ ৰাষ্ট্ৰ। হামাচে যি খুচি তাকে কৰিলে বুলিয়ে ইজৰাইলেও তাকেই কৰিবনে? আৰু আমেৰিকাই কি কৰিছে? তেওঁলোকে আনক দেখুৱাই গাজাবাসীৰ বাবে ঘঁৰিয়ালৰ চকুপানী টুকিছে ঠিকেই, কিন্তু ইজৰাইলৰ যুদ্ধ প্ৰচেষ্টাৰ প্ৰতি সকলো ধৰণে সহায় আগবঢ়াইছে। গাজাত মানুহৰ অবৰ্ণনীয় অৱস্থা। তাত এতিয়ালৈকে ইজৰাইলে কোনো সাহায্য সামগ্ৰী সোমাবলৈ দিয়া নাই।আমেৰিকাই কৈছে, তেওঁলোকে গাজালৈ ২০ ট্ৰাক সাহায্য সামগ্ৰী পঠিয়াইছে। বিশ ট্ৰাক সাহায্য সামগ্ৰী এপাচি শাকত এটা জালুক নহয় নে? সেই বিশখন ট্ৰাকো এতিয়ালৈকে গাজাত সোমাব পৰা নাই। আমেৰিকাৰ ৰাষ্ট্ৰপতি জ’ বাইদেন ইজৰাইললৈ উৰা মাৰি ইজৰাইলী সমৰক উদগনি দিছে। ইজৰাইললৈ ইতিমধ্যে যুঁজাৰু বিমান আৰু সৈন্য পঠিয়াইছে।ইজৰাইল ভ্ৰমণৰ পিছত বাইদেনে পেলেষ্টানিয়ান অথৰিটি আৰু আৰৱ ৰাষ্ট্ৰ প্ৰধান সমূহৰ লগত মিলিত হোৱাৰ কথা আছিল। কিন্তু, আমেৰিকাই লোৱা পক্ষপাতিত্বমূলক অৱস্থানৰ বাবে পেলেষ্টাইন অথৰিটি আৰু আৰৱ ৰাষ্ট্ৰ সমূহে বাইদেনক লগ কৰিবলৈ সন্মত নহ’ল। মধ্য প্ৰাচ্যৰ পৰিস্থিতি অতি ভয়াবহ।কোন মুহূৰ্তত কি হয় একো ঠিক নাই। হামাচৰ বিচাৰ হওক, কিন্তু তাৰ বাবে সমগ্ৰ গাজাবাসীক অত্যাচাৰ কৰাটো কেনেধৰণৰ কথা! এটা কথা ঠিক, হিংসা প্ৰতিহিংসাৰে ইজৰাইল- পেলেষ্টাইন সমস্যাৰ সমাধান কেতিয়াও সম্ভৱ নহয়।এতিয়ালৈকে হোৱা নাই।সমাধান প্ৰক্ৰিয়াৰ বাবে তিনিটা চৰ্ত অনিবাৰ্য- অহিংস প্ৰক্ৰিয়া,আলাপ- আলোচনা আৰু ন্যায়।
