অসমৰ মুখ্যমন্ত্ৰীজন ৰাজ্য প্ৰশাসনৰ মুৰব্বী।আমি বিচাৰোঁ তেওঁৰ আচৰণ,ব্যৱহাৰ ৰাজ্য প্ৰশাসনৰ সকলোৰে বাবে আদৰ্শ আৰু অনুকৰণীয় হওক।মুখ্যমন্ত্ৰীৰ আচৰণ,ব্যৱহাৰ আৰু কথা বতৰাৰ কেইটামান দিশ অত্যন্ত গুৰুত্বপূৰ্ণ। সেইকেইটা কি? তেওঁ এনে কথা কেতিয়াও ক’ব নালাগিব যিটো আইনৰ শাসন আৰু দেশৰ সংবিধান বহিৰ্ভূত।ইয়াৰ উপৰিও তেওঁ সামাজিক শিষ্টাচাৰ মানি চলিব লাগিব।ইয়াৰ কাৰণ কি?
ইয়াৰ কাৰণ এইটোৱে যে এতিয়া আমি মধ্যযুগত বাস কৰা নাই।এতিয়াৰ সময় ৰজা মহাৰজাৰ সময় নহয়।এতিয়া দেশ শাসন হয় আইন কানুনৰ দ্বাৰা। সেই আইন কানুনো কাৰো মৰ্জি মতে প্ৰণয়ন কৰা নহয়। আইন প্ৰণয়ন কৰা হয় দেশৰ সংবিধান প্ৰদত্ত নীতি নিয়মৰ যোগেদি। আনহাতে সামাজিক শিষ্টাচাৰ সমাজ এখন পৰিচালিত হোৱাৰ অলিখিত নিয়ম।ই যিকোনো সভ্য আৰু শিষ্ট সমাজ এখনৰ এক অপৰিহাৰ্য চৰ্ত। ৰাজ্য এখনৰ মুৰব্বীৰ পৰা নিশ্চিতৰূপে আমি সেইটো আশা কৰিব পাৰোঁ।
আজি কিছুদিনৰ পৰা অসমৰ মুখ্যমন্ত্ৰী হিমন্তবিশ্ব শৰ্মাই এনে কিছুমান কথা কৈছে আৰু কাম কৰিছে যিবোৰে মুখ্যমন্ত্ৰীৰ পদবীটোৰ পদমৰ্যাদা হ্ৰাস কৰিছে।দুটা উদাহৰণ দিব বিচাৰিছোঁ। চৰকাৰী চাকৰিত মকৰল প্ৰক্ৰিয়া সম্পৰ্কে তেখেতে কৈছে যে ১৯৯৮ত হেনো কোনো আইন সংগত প্ৰক্ৰিয়া অবিহনে তেখেতৰ মুখৰ কথাতে জালুকবাৰী সমষ্টিৰ পৰা ৩০ জন লোকক শিক্ষকৰ চাকৰিত মকৰল কৰা হৈছিল।এইটো কেনে কথা?
মুখ্যমন্ত্ৰীজনে তেখেতৰ দিনত নিকা প্ৰক্ৰিয়াৰ যোগেদি যুবক-যুৱতীক চাকৰিত মকৰল কৰা হৈছে বুলি প্ৰতিপন্ন কৰিবলৈ গৈ তেওঁ ২৪ বছৰৰ আগৰ অবৈধ মকৰল প্ৰক্ৰিয়া এটাৰ কথা কৈছে।তেওঁ কোৱা কথাটোত আমি একো গুৰুত্ব নিদিলোহেঁতেন আৰু এইটোক সেই সময়ৰ চৰকাৰৰ এটা ডাঙৰ বিচ্যুতি বুলি গণ্য কৰিলোহেঁতেন যদিহে ঘটনাটোৰ লগত তেওঁ নিজে জড়িত নহ’লহেঁতেন আৰু তেওঁ আজি অসমৰ মুখ্যমন্ত্ৰী নহ’লহেঁতেন। কিন্তু, এতিয়াৰ মুখ্যমন্ত্ৰী এজন তেতিয়াৰ অবৈধ নিযুক্তি প্ৰক্ৰিয়াৰ লগত জড়িত আছিল বুলি ঘোষণা কৰাটো কেনে কথা?
এতিয়া সেই বিষয়ে কি আইনী ব্যৱস্থা লোৱা হ’ব পাৰে সেইটো বেলেগ কথা বা সেই বিষয়ে বিশেষজ্ঞহে ক’ব পাৰিব।কিন্তু, মুখ্যমন্ত্ৰী এনে এটা ঘটনাৰ লগত জড়িত হোৱাটোৱে তেওঁৰ নৈতিক কৰ্তৃত্ব বহু পৰিমাণে লাঘব নকৰিলেনে?
দ্বিতীয় কথাটো সৌসিদিনাৰ, যোৱা ২৪ চেপ্তেম্বৰৰ। সেইদিনা জনৈক সদগুৰুৰ লগত সন্ধিয়া মুখ্যমন্ত্ৰী হিমন্ত বিশ্ব শৰ্মাই অন্য দুই এজন মন্ত্ৰীৰ লগত একেলগে নিশা কাজিৰঙা ৰাষ্ট্ৰীয় উদ্যান ভ্ৰমণ কৰে।মুখ্যমন্ত্ৰীৰ কাজিৰঙা ৰাষ্ট্ৰীয় উদ্যানৰ এই ভ্ৰমণে যথেষ্ট বিতৰ্কৰ সৃষ্টি কৰিছে।বিতৰ্কৰ মূল কাৰণ কি? প্ৰথম কথা, কাজিৰঙা ৰাষ্ট্ৰীয় উদ্যান এতিয়াও পৰ্যটকৰ বাবে মুকলি হোৱা নাই। অক্টোবৰতহে উদ্যানখন পৰ্যটকৰ বাবে মুকলি কৰি দিয়া হ’ব।
দ্বিতীয় কথা, ৰাষ্ট্ৰীয় উদ্যান চোৱাৰ সময় হ’ল পুৱা ৭ বজাৰ পৰা আবেলি ৫ বজালৈ।নিশা কাজিৰঙা উদ্যানত জীপ চাফাৰী কৰাৰ কোনো নিয়ম নাই। তৃতীয় কথা, জীপ চাফাৰী কৰোঁতে জীপখন চৰকাৰী চালকে চলোৱাটোহে নিয়ম।কিন্তু,সেইদিনা জীপখন চলাইছিল সদগুৰু বোলাজনে নিজে।কি কাৰণে এই তিনিওটা কথা অমান্য আৰু অৱজ্ঞা কৰা হ’ল? এটা যুক্তি দিয়া হৈছে যে হিমন্তবিশ্ব শৰ্মা অসমৰ মুখ্যমন্ত্ৰী।তেওঁৰ কাৰণে ৰাজ্যখনৰ কোনো ঠাই কেতিয়াও নিষিদ্ধ হ’ব নোৱাৰে?
এইটো এটা অদ্ভূত যুক্তি। হিমন্তবিশ্ব শৰ্মা অসমৰ মুখ্যমন্ত্ৰীহে। তেওঁৰ নিশ্চয় কিছুমান বিশেষ অধিকাৰ আছে। কিন্তু, সম্পদত নহয় আনকি বিপদতো তেওঁৰ কাৰণে ৰাজ্যখনৰ সকলো ঠাই উন্মুক্ত বুলি ভবাটো ভুল।কিয়নো তেওঁ এজন সৰ্বকলা বিশাৰদ ব্যক্তি নহয়। সকলো সমস্যাৰ সমাধান তেওঁৰ হাতত নাই।কিছুমান সমস্যা কেৱল বিশেষজ্ঞই সমাধান কৰিব পাৰে। আৰু অসময়ত মুখ্যমন্ত্ৰীয়ে সদগুৰুক লগতলৈ কিয় কাজিৰঙাত সোমাইছিল? তাত কিবা সমস্যাৰ সৃষ্টি হৈছিল নে তেওঁৰ লগত যোৱা দলটোৱে কাজিৰঙাৰ বন্যপ্ৰাণীৰ বিষয়ে কিবা গৱেষণা কৰিবলৈ তালৈ গৈছিল? নাই, তাত একো বিপদো হোৱা নাছিল বা তেওঁলোকে কোনো গৱেষণা কৰিবলৈও তালৈ যোৱা নাছিল।
মূল কথাটো আছিল কাজিৰঙাৰ প্ৰমোদ ভ্ৰমণ।নিশাৰ কাজিৰঙা কেনে দেখি সেইটো চোৱা।আৰু মুখ্যমন্ত্ৰীক কোনে না কৰিব পাৰে? তেওঁ সকলোৰে উৰ্দ্ধত।সেইটোৱেই আপত্তি কৰিবলগীয়া কথা।অপ্ৰয়োজনত মুখ্যমন্ত্ৰীয়ে নিজৰ পদবী ব্যৱহাৰ কৰাটোৱেই বেয়া আৰু আপত্তিজনক কথা।তেওঁ নিজে আইন ভাঙিলে অইনক আইন পালন কৰিবলৈ কোৱাৰ নৈতিক কৰ্তৃত্ব তেওঁৰ থাকিবনে? আটাইতকৈ বেয়া কামটো, নিষিদ্ধ কামটো কৰিছে সদগুৰুৱে।কাজিৰঙা এখন ব্যঘ্ৰ অৰণ্যও। তাত অন্য হ্ৰিংস্ৰ জীৱ-জন্তুও আছে। তাত যিবোৰ জীপ চালক আছে কিবা বিপদৰ উদ্ভৱ হ’লে তাৰ কেনেকৈ মোকাবিলা কৰিব লাগে তেওঁলোকৰ তাৰ প্ৰশিক্ষণ আছে।কিন্তু সদগুৰুৰ জানো তেনে প্ৰশিক্ষণ আছিল? গতিকে এইটো এটা ভয়ংকৰ বিচ্যুতি নহয়নে? তাতে স্বয়ং মুখ্যমন্ত্ৰীক লগত লৈ?
