এছিয়াৰ আটাইতকৈ ধনী ব্যক্তি মুকেশ আম্বানীৰ পুত্ৰ অনন্ত আম্বানীয়ে ১৭০ কিলোমিটাৰ দৈৰ্ঘ্যৰ পদব্ৰজে সম্পূৰ্ণ কৰে। ৬ এপ্ৰিল অৰ্থাৎ আজি জন্মদিনত অনন্তই গুজৰাটৰ জামনগৰৰ পৰা দ্বাৰকাধীশ মন্দিৰলৈ তীৰ্থযাত্ৰা সমাপ্ত কৰে। এই যাত্ৰাত তেওঁৰ লগত যোগ দিয়া সকলোকে কৃতজ্ঞতা জ্ঞাপন কৰে।
দেওবাৰে তেওঁৰ পত্নী ৰাধিকা মাৰ্চেন্ত আৰু মাতৃ নীতা আম্বানীয়ে তেওঁৰ এই যাত্ৰাত দ্বাৰকাধীশ মন্দিৰত যোগদান কৰে। পত্নী ৰাধিকাৰ মতে, অনন্তই যোৱা বছৰ বিয়াৰ পাছত এই কাম কৰিব বিচাৰিছিল, আৰু এতিয়া অৱশেষত সেই ইচ্ছা পূৰণ হৈছে। তেওঁ কয়, ‘এই বছৰ অনন্তৰ বয়স ৩০ বছৰ হ’ল। মই অতি সুখী যে আমি ইয়াত তেওঁৰ জন্মদিন এনেদৰে উদযাপন কৰিছো। অনন্তৰ লগতে ৰাধিকাইও এই পদযাত্ৰাত অংশগ্ৰহণ কৰা সকলোকে ধন্যবাদ জ্ঞাপন কৰে।’
প্ৰসংগক্ৰমে অনন্তই ২৯ মাৰ্চৰ পৰা এই ১৭০ কিলোমিটাৰ যাত্ৰা আৰম্ভ কৰিছিল। অনন্তৰ ভাষাত ‘এয়া মোৰ আধ্যাত্মিক যাত্ৰা। ভগৱানৰ নামত এই যাত্ৰা আৰম্ভ কৰিলোঁ, তেওঁৰ নামত এই যাত্ৰা শেষ কৰিম। দ্বাৰকাধীশ দেৱৰ প্ৰতি গভীৰ কৃতজ্ঞতা জ্ঞাপন কৰিলোঁ। আমাৰ লগত ইয়াত থকা সকলোকে বহুত বহুত ধন্যবাদ।’
উল্লেখ্য যে, উদ্যোগপতি মুকেশ আম্বানীৰ কনিষ্ঠ পুত্ৰ অনন্ত আম্বানীয়ে ২০২০ চনৰ পৰা জিঅ’ প্লেটফৰ্মছ লিমিটেডৰ পৰিচালনা সমিতিৰ সদস্য অনন্ত আম্বানীয়ে ২০২২ চনৰ মে’ মাহৰ পৰা ৰিলায়েন্স ৰিটেইল ভেঞ্চাৰছ লিমিটেডৰ সৈতে কাম কৰি আহিছে।২০২১ চনৰ জুন মাহৰ পৰা ৰিলায়েন্স নিউ এনাৰ্জি লিমিটেডৰ দায়িত্বও চম্ভালিছে।যোৱা বছৰৰ ১২ জুলাইত ৰাধিকা মাৰ্চেণ্টৰ সৈতে অনন্ত বিবাহপাশত আবদ্ধ হয়।
