ছেঃ লেফটেনেণ্ট জাষ্টিন অসমৰ বিৰুদ্ধে গ্ৰেপ্তাৰী পৰোৱানা জাৰি কৰিছে আলফা স্বাধীনে
সংগঠন-বিৰোধী কাম-কাজৰ লগতে সংগঠনৰ ভিতৰত থাকি বিত্তীয় বিষয়কে ধৰি বিভিন্ন কামত লিপ্ত হোৱা বাবে এজন নেতাৰ বিৰুদ্ধে গ্ৰেপ্তাৰী পৰোৱানা জাৰি কৰিছে বিদ্ৰোহী সংগঠন আলফা স্বাধীনে।
শনিবাৰে এক প্ৰেছ বিজ্ঞপ্তিযোগে সংগঠনটোৱে ইষ্টাৰ্ন কমাণ্ডৰ ছেকেণ্ড লেফটেনেণ্ট জাষ্টিন অসম ওৰফে নিজান পেগুৰ বিৰুদ্ধে গ্ৰেপ্তাৰী পৰোৱানা জাৰি কৰাৰ কথা সদৰী কৰে।
তিনিচুকীয়া জিলাৰ শদিয়া অমৰপুৰৰ ২ নং কাৰ্মি গাঁৱৰ জাষ্টিন অসমৰ বিৰুদ্ধে আলফা স্বাধীনে সেনা-চোৰাংচোৱাৰ সৈতে গোপন বুজাবুজিৰে সংগঠনৰ বিৰুদ্ধে ষড়যন্ত্ৰ কৰা, সেনাৰ সৈতে মিলি সংগঠনৰ নামত অৰ্থ সংগ্ৰহ কৰা, সংগঠনৰ অনুশাসন তথা আচৰণ বিধি উলংঘা কৰাকে ধৰি বিভিন্ন গুৰুতৰ অভিযোগ আনিছে।
আনহাতে, পূৰ্বে নেতাগৰাকীক একাধিকবাৰ সতৰ্ক কৰি দিয়াৰ লগতে নিজক সংশোধনৰ সুবিধা দিয়া হৈছিল বুলিও বিজ্ঞপ্তিটোত কোৱা হৈছে।
আলফা স্বাধীনৰ প্ৰচাৰ বিভাগৰ সচিব ৰুমেল অসমে প্ৰেৰণ কৰা বিজ্ঞপ্তিটোৰ জৰিয়তে আলফাই ছেকেণ্ড লেফটেনেণ্ট জাষ্টিন অসম ওৰফে নিজান পেগুৰ সৈতে সংগঠনৰ কোনো বিত্তীয় লেনদেন আৰু সাংগঠনিক যোগাযোগ নাৰাখিবলৈ ৰাইজৰ প্ৰতি আহ্বান জনাইছে।