নাগালেণ্ডৰ মন জিলাত অসম ৰাইফলছৰ নৃশংস হত্যাকাণ্ডৰ ঘটনাই জোকাৰি গৈছিল সমগ্ৰ দেশ। মন জিলাৰ ঘটনাৰ পুনৰাবৃত্তি ঘটাই পুনৰ সেনাবাহিনীৰ গুলিত আঘাতপ্ৰাপ্ত হৈছে দুজনকৈ নিৰীহ যুৱক। এইবাৰ অৰুণাচল প্ৰদেশত সংঘটিত হৈছে এই ঘটনা।
কালি আবেলি অৰুণাচলৰ টিৰাপ জিলাত অসম ৰাইফলছে যুৱক দুজনৰ ওপৰত গুলিচালনা কৰে। জানিব পৰা মতে, নিৰীহ যুৱক দুজন টিৰাপ জিলাৰ ছাছা গাঁৱৰ বাসিন্দা।
তেওঁলোকে নদীত মাছ মাৰি ঘৰলৈ উভটাৰ পথতে সন্ত্ৰাসবাদীৰ সন্দেহত অসম ৰাইফলচে গুলিচালনা কৰে। যুৱক দুজন বৰ্তমান স্থানীয় চিকিৎসালয়ত ভৰ্তি কৰোৱা হৈছে বুলি অসম ৰাইফলছৰ এজন জ্যেষ্ঠ বিষয়াই জনাইছে।
উল্লেখযোগ্য যে যোৱা বৰ্ষৰ ডিচেম্বৰত নাগালেণ্ডৰ মন জিলাত ১৪ জন নিৰীহ লোকক সেনাবাহিনীয়ে নিৰ্বিচাৰে গুলী চলাই হত্যা কৰাৰ ফলত তীব্ৰ উত্তেজনা বিৰাজ কৰিছিল।
এই ঘটনাৰ পিছত উত্তৰ-পূবৰ পৰা আফস্পা বাতিলৰ দাবীত তীব্ৰ আন্দোলনৰ সৃষ্টি হৈছিল। শেহতীয়াকৈ গৃহমন্ত্ৰী অমিত শ্বাহে উত্তৰ-পূবৰ কিছু অঞ্চলৰ পৰা আফস্পা বাতিলৰ ঘোষণা কৰিছে।
কিন্তু অসম, নাগালেণ্ড, মণিপুৰ আৰু অৰুণাচল প্ৰদেশৰ বহুকেইখন জিলাৰ পৰা এতিয়াও আফস্পা বাতিল কৰা হোৱা নাই। ইয়াৰ ভিতৰত অন্যতম হৈছে অৰুণাচল প্ৰদেশৰ টিৰাপ জিলা।
গৃহমন্ত্ৰীগৰাকীয়ে কৰা উক্ত ঘোষণাৰ দুদিন পাছতে এইদৰে সেনাবাহিনীৰ হাতত দুজন যুৱক আঘাটপ্ৰাপ্ত হোৱাটো তাৎপৰ্যপূৰ্ণ হিচাপে বিবেচিত হৈছে।
