ৰাছিয়াত বিমান দুৰ্ঘটনাত নিহত হৈছে ভাড়াতীয়া ৱেগনাৰ গ্ৰুপৰ মুৰব্বী য়েভগেনি প্ৰিগোজিন। বাতৰি অনুসৰি, ৰাছিয়াৰ এখন বিমান দুৰ্ঘটনাগ্ৰস্ত হৈ ১০ জন লোকৰ মৃত্যু হয়। বিমানখনত মাত্ৰ ১০ জন লোকেই আছিল। ৰাছিয়াই দিয়া নিহত ১০ জন লোকৰ তালিকাত আছে য়েভগেনি প্ৰিগ’জিনৰ নাম।
ইয়াৰ পূৰ্বে ৱেগনাৰৰ ঘনিষ্ঠ এটা টেলিগ্ৰাম চেনেল গ্ৰে জ’নে মস্কোৰ উত্তৰত থকা তেভৰ অঞ্চলত বিমানখন গুলীয়াই ভূপতিত কৰাৰ বাতৰি প্ৰকাশ কৰিছিল।
জুন মাহত প্ৰিগ’জিনে ৰাছিয়াৰ সশস্ত্ৰ বাহিনীৰ বিৰুদ্ধে বিদ্ৰোহৰ নেতৃত্ব দিছিল; যিটো অৱশেষত বিফল হয়। তাৰ পিছত ৱেগনাৰৰ বাহিনীৰ মুৰব্বী য়েভগেনি প্ৰিগোজিনে আত্মগোপন কৰে। প্ৰায় এমাহ পিছত ২০ জুলাইত প্ৰথমবাৰৰ বাবে ৰাজহুৱা স্থানত অহাৰ খবৰ পোৱা গৈছিল। তাৰ প্ৰায় এমাহ পিছত তেওঁৰ মৃত্যুৰ খবৰ আহিল।
একাধিক সংবাদ মাধ্যমৰ বাতৰি অনুসৰি জেটখন প্ৰকৃততে ভাড়াতীয়া গোট ৱেগনাৰ গ্ৰুপৰ মুৰব্বী প্ৰিগ’জিনৰ। অৱশ্যে এই সন্দৰ্ভত আনুষ্ঠানিকভাৱে একো ঘোষণা কৰা হোৱা নাই। ৰাছিয়াৰ অসামৰিক বিমান পৰিবহণ নিয়ন্ত্ৰকে কয় যে যাত্ৰী তালিকাত প্ৰিগ’জিনৰ নাম আছে।
ৰাছিয়াৰ চৰকাৰী সংবাদ সংস্থা টাছে ৰাছিয়াৰ জৰুৰীকালীন বিভাগৰ বিষয়াৰ উদ্ধৃতি দি বিমানখনত তিনিজন পাইলট থকাৰ বাতৰি প্ৰকাশ কৰিছে। সেই বিমানখনত আছিল সাতজন যাত্ৰী। মস্কোৰ পৰা বিমানখন চেণ্ট পিটাৰ্ছবাৰ্গলৈ গৈ আছিল। প্ৰতিবেদনত কোৱা হৈছে যে বিমানখন মস্কোৰ পৰা ১০০ কিলোমিটাৰ উত্তৰত অৱস্থিত ঠাইত দুৰ্ঘটনাগ্ৰস্ত হয়।
