যোৱা ১ অক্টোবৰৰ দিনা হোজাই জিলাৰ ফৰমাৰপাৰ হাইস্কুলৰ ছাত্ৰ-ছাত্ৰীক ৰুবেলা ভেকচিন প্ৰদান কৰিবলৈ যাওতে একাংশ উন্মাদ লোকে চাৰিগৰাকী নাৰ্ছৰ লগতে এগৰাকী আশা কৰ্মীক আক্ৰমণ কৰি গুৰুতৰভাৱে আহত কৰা ঘটনাৰ এতিয়াও অন্ত পৰা নাই চাঞ্চল্য।
এই ঘটনাৰ তদন্ত বিচাৰি বুধবাৰে অসম ৰাজ্যিক আশা কৰ্মী য়ুনিয়নৰ হোজাই জিলা সমিতিৰ আহ্বানত অৰ্ধ সহস্ৰাধিক আশা কৰ্মীয়ে হোজাই জিলা উপায়ুক্তৰ কাৰ্যালয়ৰ সম্মুখত ধৰ্ণা কাৰ্যসূচী ৰূপায়ন কৰে।
উল্লেখযোগ্য যে জিলা প্ৰশাসন আৰু স্বাস্থ্য বিভাগে উক্ত আক্ৰমণত গুৰুতৰভাৱে আঘাত প্ৰাপ্ত এন এন এম নাৰ্ছ আৰু আশা কৰ্মী সকলৰ প্ৰতি দেখুওৱা হেমাহিৰ বিৰুদ্ধে আৰু আহত সকলক এককালীন আৰ্থিক সাহায্য প্ৰদানৰ দাবীতে আশা কৰ্মী য়ুনিয়নে ধৰ্ণা কাৰ্যসূচী গ্ৰহণ কৰে বুলি জানিবলৈ দিয়ে।
প্ৰতিবাদকাৰী সকলে আশা কৰ্মী সকলক পৰ্যাপ্ত নিৰাপত্তাৰ ব্যৱস্থা কৰা, ৰাজহুৱা আক্ৰমণৰ বলি হোৱা অতি দৰিদ্ৰ বিধৱা আশা কৰ্মী আয়াৰুন নেছাক এক কালীন আৰ্থিক সাহায্য প্ৰদান কৰা, ফৰমাৰ হাইস্কুলত আশা কৰ্মী-এ এন এম নাৰ্ছক আক্ৰমণ কৰা সকলৰ বিৰুদ্ধে কঠোৰ আইনী ব্যৱস্থা লোৱা, ভেকচিন প্ৰদানৰ আগতে ৰাইজৰ মাজত সজাগতা সভা অনুষ্ঠিত কৰা, ভেকচিন, বন্ধ্যাকৰণ আদিৰ ক্ষেত্ৰত সমাজত অপ-প্ৰচাৰ বিয়পোৱা সকলৰ বিৰুদ্ধে কঠোৰ আইনী ব্যৱস্থা লোৱা আদি শ্ল’গানেৰে উত্তেজনাময় পৰিৱেশৰ সৃষ্টি কৰে।
প্ৰতিবাদস্থলত অসম ৰাজ্যিক আশা কৰ্মী য়ুনিয়নৰ সম্পাদিকা মিনাৰা বেগম, এ আই টি য়ু চিৰ ৰাজ্যিক সম্পাদক ৰাতুল বৰা, এ আই টি য়ু চিৰ হোজাই জিলা সমিতিৰ নেতা ক্ৰমে নুৰুল হক, আব্দুৰ ৰৌফ, নুৰ উদ্দিন আহমেদ, চি আই টি য়ুৰ ৰাজ্যিক নেতা যজ্ঞেশ্বৰ দাসে প্ৰতিবাদকাৰী সকলক উদ্দেশ্যি বক্তব্য ৰাখে।
প্ৰায় দুঘন্টা ধৰি চলা ধৰ্ণা কাৰ্যসূচীৰ অন্তত অসম ৰাজ্যিক আশা কৰ্মী য়ুনিয়নৰ হোজাই জিলা সমিতিৰ সভানেত্ৰী তানজিলা বেগম আৰু সম্পাদিকা দীপাঞ্জলি হাজং স্বাক্ষৰিত এখন সাত দফীয়া দাবী সম্বলিত স্মাৰকপত্ৰ হোজাই জিলা উপায়ুক্তক প্ৰদান কৰে।
উল্লেখ্য যোৱা এক এপ্ৰিলৰ পৰা হোজাই জিলাৰ আশা কৰ্মী সকলে কৰ্ম বিৰতি পালন কৰি আহিছে যদিও কালি জিলা প্ৰশাসনৰ লগত হোৱা আলোচনা মৰ্মে সাময়িকভাৱে কৰ্ম বিৰতি স্থগিত ৰখাৰ সিদ্ধান্ত গ্ৰহণ কৰে। এমাহৰ ভিতৰত জিলা প্ৰশাসনৰ দাবী সমূহ কাৰ্যকৰী নকৰিলে পুনৰ কৰ্ম বিৰতি কৰিব বুলি আশা কৰ্মী য়ুনিয়নৰ নেতৃত্বই জানিবলৈ দিয়ে।
