কটকৰ ড্ৰীমছ গ্ৰাউণ্ডত অসম আৰু ওড়িশাৰ মাজত অনুষ্ঠিত হোৱা ৰঞ্জি ট্ৰফীৰ খেলত বিৰল কৃতিত্বৰ অধিকাৰী হৈছে অসমৰ উইকেটৰক্ষক বেটছমেন কুণাল শইকীয়া।
অসমৰ ৩১ বছৰীয়া উইকেটৰক্ষক বেটছমেন গৰাকীয়ে ওড়িশাৰ বিৰুদ্ধে জীৱনৰ ৬১ সংখ্যক ৰঞ্জী মেচত এদিনতে দুটাকৈ হাফ চেঞ্চুৰী কৰাৰ কৃতিত্ব গঢ়ে।
ওড়িশাৰ বিৰুদ্ধে অসমৰ হৈ প্ৰথম ইনিংছত কুণালে ৫২ ৰানৰ এক দায়িত্বশীল ইনিংছ খেলাৰ পাছতো অসম ফল’অনৰ সন্মুখিন হয় আৰু দ্বিতীয় ইনিংছতো বেটিং কৰিবলৈ আহি কুণালে অৰ্ধশতকীয় ইনিংছ খেলে।
এদিনতে দুটাকৈ হাফ চেঞ্চুৰী কৰা কুণাল শইকীয়া অসমৰ প্ৰথম গৰাকী বেটছমেন হিচাপে পৰিগণিত হয়।
উল্লেখযোগ্য যে, উইকেটৰক্ষক বেটছমেন কুণাল শইকীয়াই ৬১ সংখ্যক প্ৰথম শ্ৰেণীৰ খেলৰ ৯৯ সংখ্যক ইনিংছত এই বিৰল কৃতিত্বৰ গৰাকী হয়।
আনহাতে, কুণাল শইকীয়াৰ এদিনতে দুটাকৈ অৰ্ধশতকীয় ইনিংছৰ পাছতো অসম ওড়িশাৰ বিৰুদ্ধে এক ইনিংছ আৰু ৩ ৰানৰ বিশাল ব্যৱধানত পৰাস্ত হয়।
