ৰাজনৈতিক জীৱনৰ আদি গুৰু, প্ৰবীণ বিজেপি নেতা তথা প্ৰাক্তন কেন্দ্ৰীয় মন্ত্ৰী কবীন্দ্ৰ পুৰকায়স্থৰ স্থানত অহা লোকসভা নিৰ্বাচনত শিলচৰ সমষ্টিৰ পৰা প্ৰতিদ্বন্দ্বিতা কৰাৰ বাবে প্ৰস্তুতি চলাইছে হোজাইৰ বিধায়ক শিলাদিত্য দেবে।
যোৱা নিৰ্বাচনত মোদী ঢৌৰ মাজতো ‘পৰিয়ালৰ সমষ্টি’ নিজৰ কব্জাত ৰাখিবলৈ সক্ষম হোৱা শক্তিশালী সুস্মিতা দেবৰ প্ৰতিদ্বন্দ্বীৰূপে অসমত বাঙালীৰ ৰক্ষাকৰ্তাৰ ভূমিকাত অৱতীৰ্ণ হোৱা শিলাদিত্য দেবকে প্ৰথম পচন্দৰ প্ৰাৰ্থী হিচাপে ৰাখিছে দলৰ শীৰ্ষ নেতৃত্বই।
নৰ্থ ইষ্ট নাও-ৰ আগত এই বিশেষ ৰাজনৈতিক ‘খবৰ’টো প্ৰকাশ কৰিছে বিজেপিৰ নতুন দিল্লীস্থিত এক উচ্চস্তৰীয় সূত্ৰই।
শিলচৰত ৩৫ শতাংশ মুছলমানৰ ভোটৰ বিপৰীতে নিৰ্ণায়ক ভূমিকা লৈ আহিছে হিন্দু বাঙালীৰ ভোটে। ’১৪ৰ নিৰ্বাচনত নিজৰ দীৰ্ঘকালৰ ৰাজনৈতিক প্ৰতিদ্বন্দ্বী সন্তোষ মোহন দেবৰ কন্যা সুস্মিতাৰ হাতত পৰাজিত হৈছিল গেৰুৱা দলটোৰ প্ৰবীণ নেতা কবীন্দ্ৰ পুৰকায়স্থ।
পুৰকায়স্থৰ পুত্ৰ তথা কাছাৰ জিলা বিজেপিৰ সাধাৰণ সম্পাদক কনদ পুৰকায়স্থও শিলচৰ সমষ্টিৰ টিকেটৰ দাবীদাৰ যদিও সূত্ৰটোৰ মতে তেওঁতকৈ দলৰ শীৰ্ষ নেতৃত্বৰ অধিক পচন্দৰ প্ৰাৰ্থী শিলাদিত্য। যোৱা বিধানসভা নিৰ্বাচনতো বৰখলা সমষ্টিত বিজেপিৰ টিকেট বিচাৰি বিমুখ হৈছিল কনদ পুৰকায়স্থ।
হিন্দু বাঙালীৰ মাজত পুৰকায়স্থ-পুত্ৰতকৈ শিলাদিত্য অধিক পৰিচিত হোৱাৰ উপৰি হোজাইৰ বিধায়কজনৰ কাৰণে শিলচৰ খুবেই চিনাকি সমষ্টি। শিলাদিত্য দেব আছিল প্ৰাক্তন কেন্দ্ৰীয় মন্ত্ৰী পুৰকায়স্থৰ ব্যক্তিগত সচিব।
সূত্ৰটোৰ মতে বয়সৰ ফালৰ পৰাও ৯০ গৰকিবলৈ মাত্ৰ ৩টা বছৰ থকা পুৰকায়স্থৰ পৰিৱৰ্তে অহা লোকসভাত টিকেট প্ৰত্যাশীৰ দৌৰত আগবাঢ়ি আছে হোজাইৰ বিধায়ক শিলাদিত্য।
৮০ৰ ঊৰ্ধ্বৰ নেতাসকলক পৰ্য্যায়ক্ৰমে আঁতৰোৱাৰ এক অলিখিত নীতি অনুসৰণ কৰিছে মোদী-শ্বাহ নেতৃত্বাধীন দলটোৱে। লালকৃষ্ণ আদৱানি, মুৰলি মনোহৰ যোশীৰ দৰে প্ৰতিষ্ঠাপক নেতা বৰ্তমানো সাংসদ হৈ আছে যদিও তেওঁলোক এতিয়া কাৰ্য্যতঃ প্ৰভাৱহীন। ২০১৪ চনৰ মে’ত শাসনলৈ অহাৰ ৩ মাহৰ ভিতৰতে মোদী-শ্বাহ নেতৃত্বাধীন বিজেপিয়ে দলৰ প্ৰতিষ্ঠাপক ত্ৰিমূৰ্তি বাজপেয়ী-আদৱানি-যোশীক সংসদীয় সমিতিৰ পৰিৱৰ্তে ‘মাৰ্গ দৰ্শক মণ্ডলী’ত স্থান দিছিল।
পুৰকায়স্থৰ নতুন দিল্লীস্থিত আৱাসৰ চাঁদৰ এটা সৰু কোঠাৰ পৰাই নিজৰ ৰাজনৈতিক জীৱন আৰম্ভ কৰিছিল হোজাইৰ বিধায়ক শিলাদিত্যই।
এতিয়া ৰাজনীতিৰ কালচক্ৰত নিজৰ ৰাজনৈতিক জীৱনৰ গুৰুৰ আসনেই দখল কৰিবলৈ আগবাঢ়িছে হোজাইৰ বিধায়কজনে।
