দেৰগাঁৱৰ লাচিত বৰফুকন আৰক্ষী একাডেমীত অনুষ্ঠিত অসম ৰাজ্যিক কেবিনেটৰ বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হৈছে। বৈঠকৰ পিছত মুখ্যমন্ত্ৰী হিমন্ত বিশ্ব শৰ্মাই সংবাদমেলত এই সিদ্ধান্তসমূহৰ বিষয়ে সদৰি কৰে। চাহ শ্ৰমিকৰ মজুৰি বৃদ্ধিৰ পৰা কাজিৰঙা ৰাষ্ট্ৰীয় উদ্যানৰ সীমা সম্প্ৰসাৰণলৈকে এই সিদ্ধান্তসমূহে ৰাজ্যৰ উন্নয়নৰ দিশত গুৰুত্বপূৰ্ণ ভূমিকা পালন কৰিব।
তলত এই সিদ্ধান্তসমূহৰ সাৰাংশ দিয়া হ’ল:
কনচাৰ্ট পৰ্যটন নীতি: কেবিনেটে ‘অসম কনচাৰ্ট পৰ্যটন নীতি’ অনুমোদন কৰিছে, যাৰ লক্ষ্য অসমক বিশ্বমানৰ সংগীত আৰু বিনোদন পৰ্যটনৰ কেন্দ্ৰ হিচাপে গঢ়ি তোলা। এই নীতিৰ জৰিয়তে উন্নত পোহৰ আৰু শব্দ প্ৰযুক্তিৰ সৈতে কনচাৰ্টৰ স্থান নিৰ্মাণৰ লগতে পৰ্যটন বিভাগৰ পৰা ভি জি এফৰ জৰিয়তে সংগীতানুষ্ঠানৰ বাবে সমৰ্থন আগবঢ়োৱা হ’ব।
চাহ শ্ৰমিকৰ মজুৰি বৃদ্ধি: অসম চাহ নিগমৰ অধীনৰ বাগিচাৰ শ্ৰমিকৰ দৈনিক মজুৰি ২২০ টকাৰ পৰা ২৫০ টকালৈ বৃদ্ধিৰ সিদ্ধান্ত লোৱা হৈছে, যি ১ অক্টোবৰৰ পৰা কাৰ্যকৰী হ’ব।
সৌৰ শক্তি নীতি: ‘অসম সৌৰ শক্তি উৎপাদন নীতি ২০২৫’ অনুমোদনৰ জৰিয়তে ২০৩০ চনৰ ভিতৰত ৩৫০০ মেগাৱাট সৌৰ শক্তি উৎপাদনৰ লক্ষ্য নিৰ্ধাৰণ কৰা হৈছে। এই নীতিয়ে বিনিয়োগ আকৰ্ষণৰ লগতে ১৫,০০০ নিয়োগৰ সুযোগ সৃষ্টি কৰিব।
লাচিত বৰফুকন আৰক্ষী একাডেমী: একাডেমীৰ দ্বিতীয় পৰ্যায়ৰ উন্নয়নৰ বাবে ২২৯.৪১ কোটি টকাৰ অনুমোদন দিয়া হৈছে, যি দুই বছৰত সম্পূৰ্ণ হ’ব।
ডিব্ৰুগড়ত নতুন সংসদ পৰিসৰ: ২৮৪.০৩ কোটি টকাৰ ব্যয়েৰে ডিব্ৰুগড়ত নতুন বিধানসভা কমপ্লেক্স আৰু বিধায়ক হোষ্টেল নিৰ্মাণৰ অনুমোদন।
খনিকৰ ষ্টেডিয়াম উন্নীতকৰণ: ২০৯.১৩ কোটি টকাৰ ব্যয়েৰে খনিকৰ ষ্টেডিয়ামৰ আসন ক্ষমতা ৫,০০০ৰ পৰা ৩৫,০০০লৈ বৃদ্ধিৰ সিদ্ধান্ত।
কাজিৰঙাৰ সীমা সম্প্ৰসাৰণ: কাজিৰঙা ৰাষ্ট্ৰীয় উদ্যানৰ ৬ষ্ঠ সংযোজনৰ অধীনত ৪৭,৩০৬.৩৩ হেক্টৰ এলেকাৰ চূড়ান্ত অধিসূচনাৰ অনুমোদন, কেইবাটাও গাঁও বাহিৰ কৰি।
নুমলীগড় ৰিফাইনাৰীত বিনিয়োগ: নুমলীগড় ৰিফাইনাৰী লিমিটেডত অসম চৰকাৰৰ চতুৰ্থ আৰু চূড়ান্ত ইকুইটি বিনিয়োগৰ বাবে ২০৫.৭২৫ কোটি টকাৰ অনুমোদন, যাৰ ফলত ৮২৩ কোটি টকাৰ প্ৰতিশ্ৰুতি পূৰণ হ’ব।
