বৰাকৰ কয়লা অৰু ছুপাৰি ছিণ্ডিকেটৰ সৈতে জড়িত হৈ আছে ৰাজ্যৰ বনমন্ত্ৰী পৰিমল শুক্লবৈদ্য আৰু খোদ মুখ্য মন্ত্ৰী কাৰ্য্যালয়ৰে এগৰাকী বিষয়া। এই অভিযোগ এ আই ইউ ডি এফৰ বিধায়ক আনোৱাৰ হুছেইন লস্কৰৰ।
বুধবাৰে দিচপুৰৰ বিধায়ক আৱাসত হাইলাকাণ্ডিৰ বিধায়কজনে এক সংবাদমেল সম্বোধন কৰি এই অভিযোগ আনে।
উল্লেখযোগ্য যে ৰাজ্যত পাৰ হৈ যোৱা লোকসভা নিৰ্বাচনৰ ভোটগ্ৰহণৰ সময়ত নিৰ্বাচনী হিংসা আৰু ভোটকেন্দ্ৰৰ বিধায়কক প্ৰহাৰ কৰাৰ অভিযোগত আনোৱাৰ হুছেইন লস্কৰৰ বিৰুদ্ধে হাইলাকান্দি আৰক্ষীয়ে এক গোচৰ ৰুজু কৰিছে।
আৰক্ষীয়ে ৰুজু কৰা উক্ত গোচৰ ভুৱা বুলি অভিযোগ কৰি বিধায়ক গৰাকীয়ে সাংবাদিকৰ আগত কয়, ‘বজৰং দলৰ প্ৰৰোচনাত হাইলাকান্দিৰ আৰক্ষী অধীক্ষক আৰু অতিৰিক্ত আৰক্ষী অধীক্ষকে মোৰ বিৰুদ্ধে মিছা গোচৰ ৰুজু কৰিছে। ভোটগ্ৰহণৰ সময়ত মই নিৰ্বাচনী হিংসা কৰা, ভোটকেন্দ্ৰৰ বিধায়কক প্ৰহাৰ কৰাৰ মিছা অভিযোগ জাপি দিছে।‘
ইয়াৰ আঁৰত বৰাকৰ ছুপাৰি ছিণ্ডিকেটৰ সৈতে জড়িত মুখ্য মন্ত্ৰী কাৰ্য্যালয়ৰ এগৰাকী বিষয়াৰ হাত আছে বুলি তেওঁ দাবী কৰে। ‘বৰাকৰ কয়লা, ছুপাৰি ছিণ্ডিকেটৰ আঁৰৰ ব্যক্তি কাশ্যপ নামৰ মুখ্য মন্ত্ৰীৰ এজন বিশেষ কৰ্তব্যৰত বিষয়াৰ নিৰ্দেশতে মোৰ বিৰুদ্ধে এই ষড়যন্ত্ৰ ৰচনা কৰা হৈছে’, -তেওঁ কয়।
এই সন্দৰ্ভত তেওঁ অসম আৰক্ষীৰ সঞ্চালকপ্ৰধানক লিখিতভাৱে অভিযোগ দিয়া বুলি সদৰী কৰি হাইলাকান্দিৰ আৰক্ষী অধীক্ষক আৰু অতিৰিক্ত আৰক্ষীৰ ভূমিকাৰ ওপৰত সন্দেহ ব্যক্ত কৰে।
আনহাতে ‘বজৰং দলৰ কৰ্মকৰ্তাসকলক হাইলাকান্দিৰ আৰক্ষীয়ে ৰক্ষণাবেক্ষণ’ দিয়াৰ গুৰুতৰ অভিযোগ আনি তেওঁ লগতে কয়, ‘বজৰং দলে মোৰ বিৰুদ্ধে ছ’চিয়েল মিডিয়াত ব্যাপক অপপ্ৰচাৰ চলোৱাৰ সন্দৰ্ভত অভিযোগ দিয়াৰ পিছতো হাইলাকান্দিৰ আৰক্ষীয়ে ব্যৱস্থা গ্ৰহণ কৰা নাই। ভোটগ্ৰহণৰ দিনাও ২০৫নং বৰিয়াদি পাঠশালা ভোটকেন্দ্ৰত বজৰং দলৰ কৰ্মকৰ্তাই ৰিগিং কৰিবলৈ আহিছিল। ইয়াৰ বাধা দিবৰ বাবেই মই ভোটকেন্দ্ৰটোত সেইদিনা উপস্থিত হৈছিলোঁ।‘
আনহাতে বনমন্ত্ৰী পৰিমল শুক্লবৈদ্য বৰাকৰ কয়লা ছিণ্ডিকেটৰ সৈতে জড়িত আছে বুলি দাবী কৰি তেওঁ কয়, ‘বৰাকৰ কয়লা ছিণ্ডিকেটৰ সৈতে বনমন্ত্ৰী পৰিমল শুক্লবৈদ্যও জড়িত আছে। বৰাকৰ পৰা কয়লা এতিয়া পৰিমল শুক্লবৈদ্যৰ সমষ্টি হৈ বাংলাদেশলৈ যায়।‘
