অসমৰ হিন্দু-মুছলমানৰ মাজত থকা ঐক্য সম্প্ৰীতিৰ নিদৰ্শন পুনৰ এবাৰ দাঙি ধৰি লখিমপুৰ জিলাৰ এটা হিন্দু পৰিয়ালে কবৰস্থানৰ বাবে দান কৰিলে নিজৰ মাটি।
কালি অৰ্থাৎ দেওবাৰে জিলাখনৰ গড়হগাৰ বাসিন্দা প্ৰয়াত কৰুণাকান্ত ভুঞা নামৰ লোকজনৰ পৰিয়ালৰ লোকে উত্তৰ লখিমপুৰ ৰে’লৱে ষ্টেশ্যনৰ সমীপত থকা নাহৰ পুখুৰী কবৰস্থানলৈ ১ বিঘা ২ কথা আৰু ১৯ লেচা মাটি দান কৰে।
এই উপলক্ষে নাহৰ পুখুৰী কবৰস্থান কমিটিৰ পৰিচালনা সমতিয়ে আয়োজন কৰা এখন সভাত উক্ত পৰিয়ালটোৰ সদস্যসকলক সম্বৰ্ধনা জনোৱা হয়।
অৱসৰপ্ৰাপ্ত অধ্যাপক ড০ হামিদুৰ ৰহমানৰ সভাপতিত্বত আয়োজিত সভাই ক্ৰমে জয়ন্ত কুমাৰ দত্ত, দিবাকৰ দত্ত, অঞ্জন কুমাৰ ভুঞা, দেব প্ৰতিম দত্ত আৰু প্ৰনৱ দত্তক সম্বৰ্ধনা জনায়।
উল্লেখযোগ্য যে নাহৰ পুখুৰী কবৰস্থানখৰ সীমাৰ লগতে লাগি আছে হিন্দুসকলৰ এখন শ্মশান।
