ৰন্ধন গেছৰ লগতে পেট্ৰ’ল, ডিজেলজাতিয় ইন্ধনৰ মূল্য বৃদ্ধিৰ মুল্যবৃদ্ধিৰ বিৰুদ্ধে অসম মহিলা প্ৰদেশ কংগ্ৰেছে আজি ৰূপায়ণ কৰা প্ৰতিবাদৰ অংশ হিচাপে হোজাইত জিলা মহিলা কংগ্ৰেছে তীব্ৰ প্ৰতিবাদ সাব্যস্ত কৰে।
হোজাই জিলা মহিলা কংগ্ৰেছ আৰু সেৱা দলৰ যৌথ উদ্যোগত আয়োজিত ধৰ্ণা কাৰ্যসূচীত কেবাশতাধিক প্ৰতিবাদকাৰীয়ে হাতে হাতে চিলিণ্ডাৰ, চৌকা লৈ ‘গেছ চিলিণ্ডাৰ আছে, গেছ নাই’, ‘চৌকা আছে, কেৰাচিন তেল নাই’, ‘মোদী চৰকাৰ হায়-হায়’ ‘মূল্যবৃদ্ধি ৰোধ কৰক’ আদি শ্ল’গানেৰে হোজাই জিলাৰ নীলবাগানৰ ৫৪ নং ৰাষ্ট্ৰীয় ঘাইপথ উত্তাল কৰি তোলে।
নীলবাগান ৱাৰিছ ক্লিনিকৰ সন্মুখৰ পৰা আৰম্ভ কৰি বুধবৰীয়া বজাৰৰ ৰাস্তালৈ উলিওৱা উক্ত প্ৰতিবাদী সমদলত হোজাই জিলা মহিলা কংগ্ৰেছৰ সভানেত্ৰী ৰোহিনা ৱাৰিছ, বিন্নাকান্দি ব্লক কংগ্ৰেছৰ প্ৰাক্তন সভাপতি মাহমুদ হুছেইন আৰু হোজাই জিলা কংগ্ৰেছৰ সম্পাদক বিজয়া চক্ৰৱৰ্তীয়ে উপস্থিত ৰাইজৰ আগত মোদী চৰকাৰ আৰু অসম চৰকাৰৰ কাম কাজক তীব্ৰ ভাষাৰে সমালোচনা কৰাৰ লগতে যমুনামুখৰ বিধায়ক আব্দুৰ ৰহমান আজমল আৰু হোজাইৰ বিধায়কক অকৰ্মণ্য আখ্যা দিয়ে।
অৱশ্যে প্ৰতিবাদী সমদলৰ সময়ত যান-জঁটৰ সৃষ্টি হোৱাত নীলবাগান আৰক্ষী চকীৰ আৰক্ষী আহি পৰিস্থিতি নিয়ন্ত্ৰন কৰে।
আজিৰ উক্ত সমদলত হোজাই জিলা যুৱ কংগ্ৰেছৰ সভাপতি আজহাৰুল ইছলাম, হোজাই সেৱা দলৰ চিফ ফাইজুৰ ৰহমানকে ধৰি কেবাশতাধিক পুৰুষ, মহিলা আৰু কংগ্ৰেছ দলৰ কৰ্মীসকলে অংশগ্ৰহণ কৰে।
