অসম আৰক্ষীৰ সঞ্চালকপ্ৰধান কুলধৰ শইকীয়াই শনিবাৰে কয় যে চ’চিয়েল মিডিয়াত গালি-ভাবুকি ধৰণৰ গোচৰসমূহ শেহতীয়াকৈ হঠাৎ বৃদ্ধি পোৱা বাবে ভাৰাক্ৰান্ত হৈ পৰিছে অসম আৰক্ষী।
“চ’চিয়েল মিডিয়া প’ষ্ট যেনে ফে’চবুক বা ৱটচ এপ আদিৰ প’ষ্টসমূহ সন্দৰ্ভত আজিকালি আৰক্ষী থানাসমূহলৈ বহুত গোচৰ আহিছে। চ’চিয়েল মিডিয়াত কিবা ঘটিলেই মানুহ আৰক্ষী থানালৈ আহে। আন অপৰাধমূলক গোচৰ যেনে চুৰি-ডকাইতি আদি তদন্তৰ বাবেও আৰক্ষীক কিছু অৱকাশ লাগে,” শনিবাৰৰ সংবাদমেলৰ মাজতে এই মন্তব্য শইকীয়াৰ।
“গোচৰটো যদি প্ৰকৃত তেন্তে আৰক্ষী থানালৈ অহাত কোনো ক্ষতি নাই। কিন্তু চ’চিয়েল মিডিয়াত সংঘটিত অসাৰ ঘটনাৰ বাবে যদি লোকসকলে গোচৰ দি থাকে তেন্তে গোচৰৰ সংখ্যাহে বাঢ়িব,” কয় ডিজিপিয়ে।
