প্ৰধানমন্ত্ৰী নৰেন্দ্ৰ মোদীয়ে যিমানেই বেটী বচাও, বেটী পঢ়াও শ্লোগান আওৰাই নাথাকক কিয়, দেশত পিছে মুঠেও সুৰক্ষিত অনুভৱ কৰা নাই মহিলা -শিশুসকলে। দেশৰ আন ৰাজ্যৰ কথা বাবেই দিলো অসমতেই হ্ৰাস পোৱা নাই মহিলাৰ বিৰুদ্ধে অপৰাধৰ ঘটনা। হ্ৰাস পোৱাটো দূৰৰে কথা বিগত পাঁচ বছৰ ধৰি মহিলাৰ বিৰুদ্ধে সৰ্বাধিক অপৰাধ ঘটা ৰাজ্যৰ ভিতৰত অসম এইবছৰো শীৰ্ষত আছে।
শেহতীয়াকৈ প্ৰকাশ পোৱা ২০২১ চনৰ ৰাষ্ট্ৰীয় অপৰাধ ৰেকৰ্ড ব্যুৰো (এনচিআৰবি)ৰ তথ্য অনুসৰি অসম একেৰাহে পাঁচ বছৰৰ বাবে মহিলাৰ বিৰুদ্ধে ঘটা অপৰাধৰ ক্ষেত্ৰত শীৰ্ষত আছে। বিগত বৰ্ষত অসমত মহিলাৰ বিৰুদ্ধে অপৰাধৰ হাৰ আছিল ১৬৮.৩ শতামশ।যি হাৰ ৰাষ্ট্ৰীয় হাৰতকৈ ৬৪.৫ তকৈ বেছি। মহিলাৰ বিৰুদ্ধে ঘটা অপৰাধৰ ক্ষেত্ৰত দিল্লী ১৪৭.৬ শতাংশৰ সৈতে দ্বিতীয় আৰু উৰিষ্যা ১৩৭.৮ শতাংশৰ সৈতে তৃতীয় স্থানত আছে। উল্লেখ্য ৰাষ্ট্ৰীয় অপৰাধ ৰেকৰ্ড ব্যুৰোই প্ৰস্তুত কৰা প্ৰতিবেদনত অপৰাধৰ হাৰ প্ৰতি ১,০০,০০০ জনসংখ্যাৰ হিচাবত নিৰূপণ কৰা হয়। ২০১৭ চনত অসমত মহিলাৰ বিৰুদ্ধে অপৰাধৰ হাৰ আছিল ১৪৩.৩ শতাংশ; ২০১৮ চনত এই হাৰ আছিল ১৬৬, ২০১৯ চনত ১৭৭ আৰু ২০২০ চনত ১৫৪.৩ ।
২০২১ চনত অসমতমহিলাৰ বিৰুদ্ধে ঘটা অপৰাধৰ ক্ষেত্ৰত দাখিল কৰা অভিযোগনামাৰ হাৰ আছিল ৫২.৯ শতাংশ, যি হাৰ ৰাষ্ট্ৰীয় হাৰতকৈ ৭৭.১ শতাংশতকৈও কম। এই কথাই প্ৰমাণ কৰে যে অসমত অবাধে মহিলাৰ বিৰুদ্ধে অপৰাধ ঘটি গৈছে যদিও আৰক্ষীয়ে অপৰাধীৰ ক্ষেত্ৰত যথোচিত ব্যৱস্থা গ্ৰহণত ব্যৰ্থ হৈছে। ৰাজ্যৰ গৃহ বিভাগৰো দায়িত্বত থকা হিমন্ত বিশ্ব শৰ্মাই ৰাষ্ট্ৰীয় অপৰাধ ৰেকৰ্ড ব্যুৰোৰ এই প্ৰতিবেদনৰ পিছত কেনে প্ৰতিক্ৰিয়া ব্যক্ত কৰে সেয়া লক্ষ্যণীয় হ’ব বুলি বিভিন্ন মহলত আলোচনা হৈছে।
বিগত বৰ্ষত অসমত মহিলাৰ বিৰুদ্ধে অপৰাধৰ ২৯,০৪৬ টা টা গোচৰ পঞ্জীয়ন কৰা হৈছিল। তেতিয়াৰে পৰা আজিলৈকে গোচৰ পঞ্জীয়নৰ হাৰ ১০.২২ শতাংশলৈ বৃদ্ধি হৈছে ।২০১৯ চনত অসমত মহিলাৰ বিৰুদ্ধে অপৰাধৰ গোচৰ পঞ্জীয়ন হৈছিল ৩০,০২৫ টা আৰু ২০১৮ চনত এয়া আছিল ২৭,৬৮৭ টা। ২০২০ চনত অসমত ধৰ্ষণ-তথা-হত্যাৰ লগতে দলবদ্ধ ধৰ্ষণৰ ৪৬ টা গোচৰ পঞ্জীয়ন কৰা হৈছিল । ধৰ্ষণৰ ক্ষেত্ৰত কুখ্যাতি থকা উত্তৰ প্ৰদেশতকৈ মাত্ৰ দিটা গোচৰহে কমকৈ পঞ্জীয়ন হৈছিল অসমত। সেই বৰ্ষত উত্তৰ প্ৰদেশত ধৰ্ষণৰ গোচৰ পঞ্জীয়ন হৈছিল ৪৮ টা আৰু অসমত ৪৬ টা।
অসমত ২০২০ চনত ১,৬৫৮ টা ধৰ্ষণৰ ঘটনাৰ তুলনাত যোৱা বছৰ ১,৮৩৫ টা ধৰ্ষণৰ ঘটনা পঞ্জীয়ন কৰা হৈছে৷ যোৱা বছৰ অসমত ধৰ্ষণৰ চেষ্টাৰ ঘটনা ৫৬৩ টা আৰু ৪,৫১১ টা আক্ৰমণৰ ঘটনা সংঘটিত হৈছিল। বহু বছৰ ধৰি অসমত যৌতুকজনিত মৃত্যুৰ ঘটনা কম আছিল যদিও বিগত কিছু বছৰৰ পৰা অসমত এনে ধৰণৰ অপৰাধ বৃদ্ধি পাইছে। যোৱা বছৰ সমগ্ৰ ৰাজ্যত যৌতুক সম্পৰ্কীয় ঘটনাৰ ফলত ১৯৮ গৰাকী মহিলাই কৰুণ মৃত্যুক সাৱটি ল’বলগীয়া হৈছে। ২০২০ চনত অসমত যৌতুকজনিত মৃত্যুৰ ঘটনা আছিল ১৫০ বছৰ বাগৰাৰ লগে লগে এনে ঘটনা কমক চাৰি বৃদ্ধিহে পাইছে। ২০২১ চনত মহিলাৰ ওপৰত এচিড আক্ৰমণৰ নটা ঘটনা পঞ্জীয়ন কৰা হৈছিল।
যোৱা বছৰ অসমত পঞ্জীয়ন কৰা মহিলাৰ বিৰুদ্ধে অপৰাধৰ মুঠ গোচৰৰ ভিতৰত ১২,৯৫০ টা স্বামী বা তেওঁৰ আত্মীয়ৰ দ্বাৰা মহিলাৰ ওপৰত কৰা অত্যাচাৰৰ ঘটনা আছিল। সুশাসনৰ কথা কৈ অহা হিমন্ত বিশ্ব শৰ্মাৰ অসমত ২০২১ চনত ৫,৮৬৬ টা মহিলাৰ অপহৰণৰ ঘটনা ঘটিছিল । ৰাজ্যখনত যৌন অপৰাধৰ পৰা শিশুৰ সুৰক্ষা (পকচো) আইনৰ অধীনত১,৯৪৮ টা গোচৰ নথিভুক্ত কৰা হৈছে। এনে গোচৰ সমূহৰ ভিতৰত ১,৩১৭ টা শিশুৰ ধৰ্ষণৰ গোচৰ, ৪২৪ টা যৌন নিৰ্যাতনৰ ঘটনা আৰু ১৫৮ টা যৌন হাৰাশাস্তিৰ ঘটনা আছিল।
২০২০ চনত অসমত পকচো আইনৰ অধীনত পঞ্জীয়ন হোৱা মুঠ গোচৰৰ সংখ্যা আছিল ১,৪৯৬ টা। অসমত মহিলাসকলক উপলক্ষ্য কৰি সংঘটিত কৰা চাইবাৰ অপৰাধৰ ঘটনা আছিল ৪৩২ টা । মহিলাৰ বিৰুদ্ধে চাইবাৰ অপৰাধৰ ক্ষেত্ৰত প্ৰথম স্থানত থকা ওৰিশাৰ পিছত অসম এইক্ষেত্ৰত দেশৰ দ্বিতীয় ৰাজ্য হিচাবে পৰিগণিত হৈছে।২০২১ চনত ওৰিশাত মহিলাৰ বিৰুদ্ধে চাইবাৰ অপৰাধৰ ঘটনা ঘটিছিল ৫৬৫ টা আৰু অসমত এই সংখ্যা আছিল ৪৩২ টা।
শিক্ষা ব্যৱস্থাকে ধৰি আন বহু বিষয়ত আন ৰাজ্যক সমালোচনা কৰিবলৈ গৈ টুলুঙা মন্তব্য কৰা মুখ্যমন্ত্ৰী হিমন্ত বিশ্ব শৰ্মাই মহিলাৰ সুৰক্ষাৰ ক্ষেত্ৰত ব্যৰ্থ হোৱাৰ বিষয়ত কেনে প্ৰতিক্ৰিয়া কৰিব বাৰু? গৃহ বিভাগৰ দায়িত্বত থকাৰ পিছতো মুখ্যমন্ত্ৰীয়ে আৰক্ষী বিভাগক কিয় মহিলাৰ বিৰুদ্ধে অপৰাধ সংঘটিত কৰি অহাসকলৰ বিৰুদ্ধে সঠিক সময়ত অভিযোগ নামা দাখিল কৰিব পৰা নাই বুলি প্ৰশ্ন কৰিব পৰা নাই। অসমক দেশৰ ১০ খন উন্নত ৰাজ্যৰ এখন কৰি তোলা হ’ব বুলি সততে কৈ অহা হিমন্ত বিশ্ব শৰ্মাই কোনটো বিষয়ত অসমক শীৰ্ষত ৰাখিব বিচাৰিছে? মহিলাৰ বিৰুদ্ধে অপৰাধৰ ক্ষেত্ৰত অসমক শীৰ্ষত ৰাখিয়েই মুখ্যমন্ত্ৰীয়ে আত্মসন্তুষ্টি লভিব বিচাৰিছে নেকি?এনেবোৰ প্ৰশ্নই এতিয়া বাগৰি ফুৰিছে সচেতন জনতাৰ মুখে মুখে।
