ক্ৰমশ: এখন এনকাউণ্টাৰ ৰাজ্য হোৱাৰ দিশে গতি কৰিছে অসম। বিগত এটা বছৰত অপৰাধ দমনৰ নামত ৰাজ্যৰ বিভিন্ন প্ৰান্তত ইটোৰ পিছত সিটোকৈ এনকাউণ্টাৰ কৰি আহিছে অসম আৰক্ষীয়ে।
যোৱা বৰ্ষত হিমন্ত বিশ্ব শৰ্মাই মুখ্যমন্ত্ৰী হিচাপে শপত লোৱাৰ পাছতে অসম আৰক্ষীক কাম কৰাৰ পেটাৰ্ণ সলনিৰ ঈঙ্গিত দিয়াৰ পাছতে এনকাউণ্টাৰৰ পন্থা গ্ৰহণ কৰিছিল আৰক্ষীয়ে আৰু এই পন্থাৰ ফলস্বৰূপে হোৱা মৃত্যুৰ ক্ষেত্ৰত এতিয়া অসমে দেশৰ ভিতৰতে তৃতীয় স্থান দখল কৰিছে।
এই তালিকাত অসমৰ সন্মুখত থকা ৰাজ্য দুখন হৈছে কেৱল জম্মু আৰু কাশ্মীৰ আৰু ছত্তীশগড়।
কেন্দ্ৰীয় গৃহ মন্ত্ৰালয়ৰ তথ্য অনুসৰি, ২০২১-২০২২ বৰ্ষত অসমত মুঠ ১৮ জন লোকৰ এনকাউণ্টাৰত মৃত্যু হৈছে। আনহাতে এই সময়ত জম্মু আৰু কাশ্মীৰত ৪৫ জন লোকৰ মৃত্যু হোৱাৰ বিপৰীতে ছত্তীশগড়ত ৩০ জনলোকৰ মৃত্যু হৈছে।
অৱশ্যে শেহতীয়াকৈ অসম চৰকাৰে গুৱাহাটী উচ্চতম ন্যায়ালয়ত দাখিল কৰা তথ্যত অসমত যোৱা ১৩ টা মাহত ৫১ গৰাকী লোকৰ মৃত্যু হোৱা বুলি উল্লেখ কৰিছিল। সেইফালৰ পৰা অসমে জম্মু-কাশ্মীৰ আৰু ছত্তীশগড়তকৈও তালিকাত আগবঢ়াৰ সম্ভাৱনা আছে।
উল্লেখ্য যে, ইতিমধ্যে গুৱাহাটী উচ্চ ন্যায়ালয়ে আৰক্ষীৰ এনকাউণ্টাৰ সম্পৰ্কীয় প্ৰতিটো গোচৰৰে নতুনকৈ প্ৰস্তুত কৰা তদন্ত প্ৰতিবেদন দাখিল কৰিবলৈ নিৰ্দেশ দিছে।
লগতে এনকাউণ্টাৰ গোচৰৰ তদন্তৰ বাবে উচ্চতম ন্যায়ালয়ে জাৰী কৰা নিৰ্দেশনা অনুসৰণ কৰা হৈছে নে নাই সেই সন্দৰ্ভতো প্ৰতিবেদন দাখিল কৰিবলৈ ৰাজ্য চৰকাৰক নিৰ্দেশ দিছে উচ্চ ন্যায়ালয়ে।
ন্যায়ালয়ে এই বিষয়ত নতুন প্ৰতিবেদন দাখিল কৰিবলৈ অসম চৰকাৰক ৬০ দিনৰ সময়সীমা বান্ধি দিছে। দিল্লীস্থিত অধিবক্তা আৰিফ জৱাড্ডাৰে দাখিল কৰা এখন ৰাজহুৱা স্বাৰ্থজড়িত আবেদনৰ শুনানি গ্ৰহণ কৰি উচ্চ ন্যায়ালয়ে চৰকাৰক এই নিৰ্দেশ প্ৰদান কৰে।
গোচৰটোৰ ক্ষেত্ৰত ২৯ ছেপ্টেম্বৰত পৰৱৰ্তী শুনানিৰ দিন ধাৰ্য কৰিছে গুৱাহাটী উচ্চ ন্যায়ালয়ে।
