ডিটেনশ্বন চেন্টাৰ সমূহৰ সাম্প্ৰতিক সা-সুবিধা তথা অন্যান্য দিশ সমূহ পৰ্যালোচনা কৰাৰ বাবে ৰাজ্য চৰকাৰে এখন বিশেষ পৰ্যালোচনা সমিতি গঠন কৰিছে।
আৰক্ষী উপ মহাপৰিদৰ্শক(সীমান্ত)ৰ অধ্যক্ষতাত গঠন কৰা উক্ত সমিতিখনৰ অন্যান্য সদস্য সকল হ’ল কাৰাগাৰ সমূহৰ মহাপৰিদৰ্শক, জিলা আৰু সত্ৰ ন্যায়াধীশ (অৱসৰ প্ৰাপ্ত) হৰদ্বীপ সিং, সংশ্লিষ্ট জিলাৰ মহকুমাধিপতি অথবা সহকাৰী আয়ুক্ত পৰ্যায়ৰ জিলা উপায়ুক্তই মনোনীত কৰা এগৰাকী সদস্য আৰু অধ্যক্ষই মনোনীত কৰা আন কোনো সদস্য।
এই সমিতিখনে ৰাজ্যৰ ডিটেনশ্বন চেন্টাৰ সমূহ পৰিদৰ্শন কৰি প্ৰত্যেকগৰাকী ব্যক্তিৰ আইনী সাহায্যৰ পৰ্যালোচনা, প্ৰতিগৰাকী ডিটেনশ্বন চেন্টাৰত থকা ব্যক্তিৰ স্বাস্থ্যৰ অৱস্থা, চেণ্টাৰ সমূহৰ খাদ্য, পৰিষ্কাৰ-পৰিচ্ছন্নতা আৰু জীৱন ধাৰণৰ মানদণ্ড আদি পৰ্যালোচনা কৰিব।
তদুপৰি, চেণ্টাৰত থকা শিশুসকলৰ শিক্ষা পদ্ধতি আৰু এই বিষয়ত উপযুক্ত পৰামৰ্শ ইত্যাদিকে ধৰি আনুসংগিক বিষয় সমূহৰো ওপৰতো সমিতিখনে পৰ্যালোচনা আগবঢ়াব বুলি জানিব পৰা গৈছে।
সমিতিখনে ওপৰোক্ত বিষয় সমূহত অতি শীঘ্ৰে পৰ্যালোচনা কৰি তিনি মাহৰ ভিতৰত বিতং প্ৰতিবেদন দাখিল কৰিব।
