জম্মু-কাশ্মীৰৰ পুলৱামাত সংঘটিত সন্ত্ৰাসবাদীৰ আত্মঘাটি আক্ৰমণত চহিদ হোৱা ৪০ জন বীৰ চহিদলৈ শ্ৰদ্ধাঞ্জলি জ্ঞাপন কৰি অসমৰ নগাঁও জিলাৰ পুৰণিগুদামৰ পাৰ্থপ্ৰতিম বৰুৱা নামৰ ভাস্কৰ্য্য শিল্পীজনে নিৰ্মান কৰি উলিয়াইছে চাৰে তিনিফুট উচ্চতাৰ এক বিশেষ চহিদ স্মাৰক।
অসমৰ শিল্পীজনে ১৪ ফেব্ৰুৱাৰিত সংঘটিত ঘটনাটোৰ খবৰ পায়ে চহিদ সকলৰ স্মৃতিৰক্ষাৰ বাবে মৃৎ-শিল্পৰ আৰ্হিৰে বিশেষ প্ৰতিকৃতিটো নিৰ্মাণৰ কাম হাতত লয়। শিল্পীজনৰ মতে ভাৰতীয় সেনাই দেশ মাতৃৰ সেৱাৰ বাবে সৰ্বোচ্ছ ত্যাগ কৰে। এজন শিল্পী হিচাপে দেশক প্ৰত্যক্ষভাবে সহায় কৰিব নোৱাৰিলেও নিজৰ শিল্প-কৰ্মৰ জৰিয়তে দেশবাসীৰ সেৱা কৰি যাব বুলি শিল্পীজনে মন্তব্য কৰে।
পুৰণিগুদামৰ বৰুৱাচুক নিবাসী পাৰ্ত প্ৰতীম বৰুৱাই ইতিমধ্যে বীৰ চহিদ সকলৰ বাবে নিৰ্মিত স্মাৰকৰ কাম সম্পুৰ্ণ কৰিছে আৰু এই বিশেষ স্মাৰকটো শীঘ্ৰে মুখ্য মন্ত্ৰী সৰ্বানন্দ সোণোৱলৰ জৰিয়তে দেশৰ প্ৰধান মন্ত্ৰীলৈ প্ৰেৰণ কৰিব বুলি সংবাদ মাধ্যমক জানিব দিয়ে।
উল্লেখযোগ্য যে, সামাজিকভাবে অতি সচেতন নগাঁৱৰ শিল্পীজনে বিগত সময়ত নাগৰিকত্ব সংশোধনী বিধেয়ককলৈ ৰাজ্যত চলি থকা প্ৰতিবাদৰ সময়ত নিজৰ বুকুৰ তেজেৰে ‘‘ আহ আহ ওলাই আহ সজাগ জনতা’’ বুলি লিখি ৰাইজক জাতি, মাটি, ভেটি ৰক্ষাৰ বাবে ওলাই অহাৰ বাবে আহ্বান জনাইছিল। পাৰ্থ প্ৰতীম বৰুৱাই ইতিমধ্যে কেইবাগৰাকীও বিখ্যাত ব্যাক্তিৰ প্ৰতিমূৰ্তি নিৰ্মাণ কৰিছে।
স্বাভাৱিকতে, অসমৰ শিল্পীজনৰ এনে ব্যতিক্ৰমী প্ৰয়াসে স্থানীয় তথা ৰাজ্যৰ জনসাধাৰণক উৎফুল্লিত কৰিছে।
