আজি অসমৰ সৰ্বত্ৰে হোৱা “কেব” বিৰোধী আন্দোলনলৈ সকলো স্তৰৰ সঁহাৰিৰ সমান্তৰালভাৱে মহানগৰত ওলাই আহিল অসমৰ শিল্পী সমাজ।
বিতৰ্কিত বিধেয়কখনৰ বিৰুদ্ধে প্ৰতিবাদৰ কাৰ্য্যসূচী হিচাপে চান্দমাৰিস্থিত অসম অভিযান্ত্ৰিক মহাবিদ্যালয় খেলপথাৰৰ পৰা শিল্পী সমাজে বাহিৰ কৰে এটা সমদল।
“কেব” বাতিল কৰাৰ দাবীত বেনাৰ, প্লেকাৰ্ড লৈ কেইবা শ শিল্পীয়ে গুৱাহাটী ক্লাবলৈকে এই প্ৰতিবাদী সমদলটোত ভাগ লয়।
অভিনেত্ৰী বৰষাৰাণী বিষয়া, কন্ঠশিল্পী দীক্ষু, বৰ্ণালী কলিতা, মণ্টুমণি, উৎপল কলিতাকে ধৰি শতাধিক শিল্পীক ৰাজপথত নমা দেখা যায় কেবৰ বিৰোধিতাত।
জনপ্ৰিয় অভিনেত্ৰী বৰষাৰাণী বিষয়াই নাগৰিকত্ব সংশোধনী বিধেয়কক জাতিধ্বংসী আখ্যা দি কয়, “কেব বাতিল নকৰা পৰ্য্যন্ত চৰকাৰী কাম-কাজ বা অনুষ্ঠানত অসমৰ কোনো শিল্পীয়ে সহযোগ নকৰো”।
প্ৰতিবাদটোত অংশগ্ৰহণ কৰা বিখ্যাত কৰিঅ’গ্ৰাফাৰ উদয় শংকৰৰো একেই হুংকাৰ, “চৰকাৰে যদি “কেব” বাতিল নকৰে মৰি যাম, তথাপি চৰকাৰৰ হৈ একো কাম নকৰো।”
“আজি জাতি-ধৰ্ম-বৰ্ণ নিৰ্বিশেষে আমি প্ৰতিবাদ কৰিবলৈ ওলাই আহিছো। অসম চৰকাৰ বা কেন্দ্ৰীয় চৰকাৰলৈ বিনম্ৰ অনুৰোধ অসমীয়া ভাষা-সংস্কৃতি বিনষ্ট কৰিব পৰা এই বিধেয়ক বাতিল কৰক”, সমদলৰ নেতৃত্বত থকা আন এগৰাকী জমপ্ৰিয় কন্ঠশিল্পী মণ্টুমণি শইকীয়াৰ মন্তব্য।
কণ্ঠশিল্পী দীক্ষু বৰুৱাই কয়, “চৰকাৰে অসমীয়া মানুহৰ আৱেগক লৈ যাতে খেলা নকৰে তাৰ বাবে আমি বিনম্ৰ অনুৰোধ জনাইছো। মুঠৰ ওপৰত ন’ কেব, ন’ কেব, ন’ কেব।”
